« | »

Ambany izany ny gasy?

2007-04-18 @ 06:54 in Kolontsaina

Nisy zavatra iray nahasorena ahy tsikaritro tamin’ny vaovao. Nisy fihetsiketsehana ara-kolontsaina izay notontosaina tao amin’ny Alliance française. Ny tena fitadidiako azy moa dia momba ireo mpanoratra malagasy amin’ny teny frantsay no tena naranty tao Andavamamba io. Samy manana ny aingam-panahiny tokoa ka tsy misy azo sakanana amin’izany na hanoratra amin’ny teny frantsay na hanoratra amin’ny teny malagasy. Ny mpanoratra amin’ny teny malagasy moa dia amin’ny mpiteny malagasy ihany izy no malaza raha tsy hoe misy mandika amin’ny teny vahiny malaza angaha ny asa-sorany. Ny mpanoratra amin’ny teny vahiny be mpiteny kosa dia malalaka kokoa ny tsenany ary ho betsaka kokoa ny mahafantatra azy.

Tsy dia any loatra aloha ny resako amin’izao fotoana izao. Tsy nankany an-toerana tsy akory aho fa ny hitako tao anaty vaovao ihany no ampitaiko etoana. Tsy voatery hoe latsaky ny iray minitra ny sary nampitaina tao anaty vaovao dia tsy hahita na inona na inona ihany koa. Fa inona loatra ary ilay hita ? Rehefa miresaka mpanoratra amin’ireny fampirantiana ireny dia afisy lehibe no ametrahana ny mombamomba azy tsirairay avy. Firenen-dehibe no mikarakara ny ranty ka tsy ho kitoatoa ny endriky ny afisy aseho ny mpijery amin’izany. Amin’izay fampirantiana mahafinaritra ny maso izay no misy ny indrokely na indrobe mahatohina ny olona toa anay indrindra indrindra.

Sary telo matetika no hita isaky ny afisy iray. Ny sarin’ilay mpanoratra aloha voalohany indrindra, ny sarin’ny Tour Eiffel hatrao ambaniny na fanambaniny na hatrety antokontaniny faharoa ary ny sarin’ireo zavatra manintona eny amin’ny rovan’i Manjakamiadana ny fahatelo. Ao ny sarin’ny tranovola, ny sarin’ny voromahery eo amin’ny vavahadin’ny rova, ny sarin’i Besakana (tranon’Andrianampoinimerina ho an’izay tsy mahalala) ary ny tranovato rova na fiangonana ihany koa aza. Ireo endrika fahatelo ireo izany no heverina ho mahamalagasy ny Malagasy. Hatreo aloha dia tsy misy ny olana.

Fa ny toerana ametrahana ny sary isaky ny afisy no saiky mitovitovy avokoa ary ametrahako olana. Ny sarin’ny mpanoratra eo ankavia tsy maninona loatra. Ny sary roa farany dia eo ambony ka ny sarin’i Tour Eiffel no ambony indrindra ka io no manaloka « ho ambany elany » ny sary tsirairay amin’izay hita ao amin’ny rovan’i Manjakamiadana. Io ilay endrika nanaitra ahy. Mpikambana ao amin’ny francophonie tokoa ve isika dia ao ambany elatry Frantsa avokoa izay rehetra mpikambana ao aminy indrindra fa ny kolontsaina ? Tsy toerana mitovy intsony izany no misy ny tsirairay fa misy ny patabe (Patirao)? Hanao ahoana re ny fihevitry ny manampahefana malagasy mahita izany ? eny fa na dia ny eritreritry ny mpiasa ao amin’ny Alliance française aza dia mba tiako ho fantatra ihany koa. Mety ho ao anatiny loatra koa ry zareo ka tsy mahatsapa izay mety hahatohina ny hafa izay mety ho vitsy an’isa tahaka ahy izay manoratra.

Mety ho tsy zanatany intsony tokoa isika fa mbola zanatsaina ihany raha tsy nahatsikaritra izany izay nitsidika io fampirantiana momba ny mpanoratra malagasy amin’ny teny frantsay io. Raha nankany aho ka misy ilay boky volamena mipetraka eo amin’ny fivoahan’ny efitra fampirantiana iny dia ho nosoratako izao hevitra nabosako taminareo izao.

Hevitra

Faly aho nahita ny hevitra naposakao teto.Izaho koa dia anisan'ireo tena tohina, nahita an'io afisy io, raha sendra nandalo teo anoloan'ny alliance française Andavamamba, andro vitsivitsy lasa izay.

Vao nahita ilay sary maimaika aho, dia nihevitra fa hisy mpanoratra hanao fampirantiana any paris, ary aseho afisy aty ny mikasika izany. Dia novakiako toy izao ilay sary: avy any amin'ny firenena alavitra be takona any (ao ambadiky ny tour eiffe), dia misy mpanoratra amin'ny teny frantsay, hotonga eto paris. Tsy hita misongadina manontolo intsony ilay mpanoratra fa salovanan'ny frantsay ny momba azy, sa ilay mpanoratra mihitsy ve no te hiditra ao anatin'ny frantsay? asa re!

Gaga aho ny andro manaraka nandalo teo, fa hay eto no hatao ny fampirantiana.

Ny tena nandratra ny masoko, dia nahita ilay tour eiffel toa mitsingevana, maneloelo sa mamingana ny lalan-kodiavin'ilay mpanankato aty amin'ny fireneny. Dia lasa ihany ny fisainako hoe sa ny tiana havoitra amin'ilay afisy dia hoe ireto ny mpanankato Malagasy fa mbola mankasitra sy miazakaza mafy hanenjika hifikitra amin'ny frantsay.
Dia mba mametram-panontaniana toa anao koa aho: mba ahoana ny eritreritry ny mpanakanto voakasik'io seon-javatra io mivantana? Faly ve izy fa izay avoakan'ny afisy izay mihitsy ny fahatsapana henony, SA sorena izy fa tsy afa-manoatra noho io ivon-toerana io misahana ny asa-sorany?

Inona moa no azon'ny fanjakana isan-tokony hatao manoloana ny trangan-javatra toy itony, rehefa izay no nifanarahan'ny mpanakanto sy ny mpikarakara ? Mitazana fotsiny, na marary anaty aza.

Miombo-kevitra aminao aho, fa raha tiana ny halaza sy hahazo tsena mivelatra amin'ny asa-soratra, dia mila manoratra amin'ny fitenim-pirenena be mpiteny isika. Nefa, raha ny fahalalako azy dia mbola any amin'ny laharana fahatelo, aorian'ny teny Anglisy sy teny Espaniola ny teny frantsay.
Izaho manokana aloha, mpandala ny teny Malagasy, ary sarotiny amin'ny maha Malagasy ahy, dia tena sorena amin'ny trangan-javatra tahak'itony. Raha mba izaho moa hoy aho no mpanoratra dia tsy mba handany andro hamoaka boky amin'ny teny frantsay izany aho nefa, hataon'ny olona tahaka izao. Nefa moa isika mbola miaina aoa anatin'ny tarazon'ny fanjanahan-tany sy ny francophonie ka tsy misy hanomezan-tsiny ny mpanoratra izany.
Soa fa efa vain-dohan-draharahan'ny fanjakana koa izao ny fifehezana ny teny Anglisy.

Nampidirin'i latina @ 08:14, 2007-04-18 [Valio]

Misaotra

Misaotra anao nanoratra avy hatrany sady nanamarina izay nolazaiko

Nampidirin'i jentilisa @ 08:28, 2007-04-18 [Valio]

zanatsaina ?

Tena mbola zanatsaina ny gasy maro. Indrindra ny gasin'i Lafrantsa, tsy dia mahagaga koa. Maro no tohina rehefa lazaina an'izany, kanefa dia tena izany no zava-misy.

Nampidirin'i lapino @ 14:08, 2007-04-18 [Valio]

Ambany izany ny gasy

Mahasorena tokoa izany ry Jentilisa. Nefa kosa tsy maintsy efa hitan'ny mpanakanto izany afisy izany talohan'ny hanaovana azy, raha tsy izany manko dia mbola mitombo roa heny izany ny tsy fiheverana an-dry zareo ireo satria izay tian'ilay mpikarakara (Alliance française) atao ihany no tsy maintsy nekena.
Nampidirin'i Su @ 14:17, 2007-04-18 [Valio]

Resa-gasy

Atao ahoana e? mampalahelo anefa moa inona no azo atao? tsy misy afa-tsy ny tsy manao toy izay heverina ho tsy mety rehefa tonga ny fotoana handraisana andraikitra koa... resa-bola... resaka tombontsoa... de ny malagasy malagasy ihany... ciao
Nampidirin'i gasy @ 14:42, 2007-04-18 [Valio]

Rajiosy

rehefa misy sangan'asa vita amin'ny teny malagasy, na vokatra malagasy dia mangina ny ambiny e. azoko aroso ohatra JJ Rabeaivelo izany nanoratra tamin'ny teny 2 tonta, Randja Zanamihoatra sy ireo voarakitra ao amin'ilay hoe "Hain-teny d'autrefois".

sahia milaza fa mbola tsy nisy mpanoratra malagasy amin'ny teny frantsay (raharimanana, rakotoson, etc) nahatoraka an'ireo !! tsy hoe rehefa miberoberoka faran'ny tsy hay akory dia dada ka dada :-)) saingy ry zalahy/zavavy no tena midingin-drambo...

Nampidirin'i Rajiosy @ 16:38, 2007-04-18 [Valio]

AMBANY IZANY NY MALAGASY ?

Miatrika jentilisy - hampandroso sy hampiroborobo
Mamangy,

marina fa mampalahelo ny teo-javatra toy izany fa aza adino mety misy FITRANGAN-JAVATRA tsy fantatsika ao amabadika ao = Mety ilay NAMETRAKA NY SARIN'I Tour Eiffel no tompom-bola nanatota ireo affiches koa dia nataony arak'izay TIANY sy SAI-PATANY. Manify anie ny finances-tsika e ! Aza adino io ! Koa dia manararaotra ny manam-bola.
Ny manoratra amin'ny teny hafa maro aloha amiko dia tsara ary izany tsy milaza velively fa voazanaka ny tena. Fa ny manao ny an'ny tena ho lasa-danja amin'ny an'ny sasany no tsy mety ! Ankehitriny dia efa maro ireo ankizy sy zatovo malagasy no mirona mandalina ny maha-malagasy azy ireo na dia mbola tsy dia mahafehy ny teniny tsara aza ny sasany - Efa dingana iray lehibe io ! Tsy maintsy misy fiandohany ny zava-drehetra ary mila faharetana koa izany indrindra avy amintsika samy malagasy ! Hifalio sy omeo hasiny izay kely vita fa MAMPAHERY izany ! Mila mifampitsitsy sy mifanohana isika ny hafa anie ka ny azy ihany no ampiany e !
Veloma finaritra,
Jereo ity tranonkala ity
WHONET-MADA
http://www.freewebs.com/whoiswhomada

Olga HELISOA

Nampidirin'i Mahagagamada @ 22:10, 2007-04-18 [Valio]

azy ny vola

Marina tokoa fa azy ny vola. An'ny minisiteran'ny kolontsaina frantsay araka ny eritreritro. Noho izany tsy maintsy manandratra ny azy izy. Ny tena mahasorena kosa dia ny "fisolokiana" ny momba ireo mpanoratra malagasy manoratra amin'ny teny frantsay sy ny mombamomba azy hahatonga ny taranaka hihevitra kokoa ny teny frantsay.

Na izany na tsy izany tokony hampieritreritra ny fanjakana malagasy ny toe-javatra sahala amin'izao amin'ireo mpanoratra malagasy amin'ny teny malagasy kosa

Nampidirin'i jentilisa @ 07:11, 2007-04-19 [Valio]
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Oktobra 2019 »
Ah At Ta Ar Ak Zo As
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    
Tahiry
Credits
LifeType IE7 XHTML CSS Firefox