« | »

Ankafiziko mihoatra noho ny Pazzapa

2008-07-03 @ 03:44 in Kolontsaina

Tsy azoko lavina fa anisan’ny be mpanaraka hatramin’izay ny fandaharana Pazzapa ataon’ny rta na dia tsy fanarako loatra aza. Maro ihany ny fandaharana mifandraika na mitovy amin’ny ataon’ny televiziona hafa eto an-toerana fa tsy misy mahatoraka ary tsy mbola misy mahoraka noho ny azy. Na eo aza izany dia tsy kely ny tsikera toy ny fampanofisana ny tanora halaza vetivety amin’ny alalan’ny hira ka izay angamba no nahatonga azy ireo nandray fepetra tsy handray afa-tsy ny olona mahatratra ny faha-18 ny taonany tamin’ity indray mitoraka ity. Tsy sasatra na dia izany aza ny televiziona hafa mikaroka fandaharana manana ny kanto sy tsara ho ankafizina satria mitandro ny mahamalagasy ihany. Asongadiko manokana amin’izany ny televiziona Malagasy Tvm.

Rehefa alarobia folakandro iny dia somary mifampitohy ny fandaharana vokarin’ny Malagasy sy mitodika manokana ho an’ny Malagasy na dia mety hahaliana ny vahiny ihany koa aza izany. Fandaharana famerenana ireo nefa dia tsy tian’ny mpanaraka azy ho adinoina ary tsy mankaleo aza ny mijery azy indray mandeha raha toa efa narahina izy tamin’ny faran’ny herinandro. Ny fandaharana Anim’Artista sy ny fandaharana J ‘jejo no tiako asongadina eto aloha.

Anim’artista, manasongadina ny kanto malagasy indrindra fa ny hira aloha amin’izao fotoana izao. Raha somary nibahan-toerana ny resadresaka tany aloha tany dia efa nampiana ho betsaka kokoa ny hira raha ho an’ny mpihira. Nefa tsinjoko etoana fa mety tsy hijanona intsony amin’ny lafiny hira ity fandarahana ity raha jerena ny voatendry ho mpitafa amin’izay vahiny nasaina. Nanjary nisy mpandihy na mpanao sarimihetsika manko tao ho ao nanentana, toy ny mampahatsiahy fa tsy ny mpihira ihany no artista fa mivelatra amin’ny fanolokoloana ny kanto rehetra izany.

J’Jejo, fandaharana tokony ho natokana ho an’ny vehivavy raha ny izy saingy mahafinaritra ahy ihany ny mahita tovovavy kanto maro ao anatiny milatro. Tsy anavahana volonkoditra sy fihaviana izany fa tsy mbola nahita mpilatro vazaha aho aloha tamin’ity fandaharana ity. Nahavariana aza tamin’ny fandaharana farany nojereko fa ny mpilatro iray dia tsy niverina fanindroany intsony nitondra fitafy hafa. Efa mihamaro ve ny mpilatro? Somary hafa nefa mifampitohy ny filatro ataon’ny vehivavy efa lehibe manao fandeha tsotra fa tsy amboarina tahaka ny ataon’ny mpilatro tanora, manasongadina kosa ny fahamendrehan’ny fitafin’olon-dehibe amin’zao fotoana izao ary tsy manao ho mampahamenatra ny habe efa vaventy avokoa.

Fa na eo aza ireo fandaharana roa navahako ireo dia manadino ny tena antom-panoratako aho raha izay ihany no lazaiko. Izaho angamba no tsy mahara-baovao intsony fa heveriko ho tsy mba misy mpilaza izy ity nefa tena manandratra ny hakantom-peo sy kolontsaina malagasy. Fantatrareo ve fa misy fifaninanana kabary hoan’ny sokajy rehetra hatramin’ny ankizy ka hatramin’ny efa katraka amin’izao fotoana izao mitety faritra maro? Raha tsy mahalala ianao dia efa nolazaiko anao ary izy ankehitriny.

Tamin’ny alatsinainy alina taorian’ny vaovao ary mialoha ny fandaharana kianja misahana ny fanatanjahantena no tsipalotro ny fandaharana kabary sompi-pahendrena. Mbola sokajy zandriny no naseho, tsy fantatro hoe rahoviana indray no misy manaraka fa rarakivy araka ny fiteny aho mahita ireto tanora herotrerony (mbola zaza ny iray) tafakatra amin’ny dingana manaraka mifaninana amin’izato fandaharam-pitenenana sy lantom-peo mahaliana ny mpitandro ny teny malagasy. Izaho manokana aloha tena mahatsiaro tena fa mbola tena ambany dia ambany amin’ny fitandroana ny teny malagasy miohatra amin’ireto ankizy (tsy ampy taona) ireto. Velona ho azy tanatiko tao ny hianatra kabary ary te-hahalala izay mpampianatra kabary mahay aho nahita azy ireto. Fifaninanana mila safidin’ny mpijery ihany koa izy ity ka manontanintania ihany ny ao amin’ny Tvm. Te-hiteny ny namana ao amin’ny telomiova ihany koa aho hoe asio fampianarana kabary ihany koa ao amin’ny vavahadin-tseraserantsika ao raha mbola tsy misy izany fa mety hanintona olona maro isika amin’izany.

Raha atao hoe dokambarotra ity lahatsoratro ity dia dokambarotra tsy nahazoako na dia ariary na dôlara iray na Eorô iray aza. Fantatro fa tsy hanambola ho amin’izany ny mpitandro ny teny sy ny kanto malagasy ary fantatro fa vitsy an’isa ny mpanambola hanohana izany fanandratana ny teny sy ny kanto malagasy izany ka izao no mba fandraisana anjara kely ataoko. Naleo koa miteny zavatra mahafinaritra hilana voly sy hampilendalenda izay mahatsiaro fa Malagasy rehetra e! 

Hevitra

news2dago

efa mivaotra be ny fandaharana atolotr'i ny tvm e! ary mbola maro tokoa toy ny teentalk sy ny sisa...
ilay ao tv plus momba ny tantara ny vohitra sy ny ny tanana iny koa ry jentlisa mba tena fanarako asa raha mba tsikaritrao izy iny tsy tsaroko ny lohateny fa tena tsara ilay izy.

ny lalao pes tournement kosa no mba tin'ny ankizy ato an-trano fa ny pazapa zany tena fanimbana ankizy satria maro ny mirotsaka kanefa iray no ho voafidy!

Nampidirin'i news2dago @ 07:47, 2008-07-03 [Valio]

izaho koa mba manana izay eritreritra izay foana ry jemtilisa : hianatra ny kabary malagasy (sady mino aho fa tsy dia ho sarotra loatra ho an'ny basy vava toa anay - tpt)

Nampidirin'i ikalamako @ 09:08, 2008-07-03 [Valio]

ela ihany vao azoko hoe "mpilatro" no iantsoanareo ny "mpanao défilé". fa ny vehivavy vatombatony kosa izany efa tsy mamolapolaka intsony :-))

ilay resaka kabary aloha dia tsara. ny indrony kely dia izao :
1) rehefa miresaka aminao ny akama (maro) nanao fianarana kabary dia sahala @ ireny hangata-bady anao ry zalahy !
2) mety manakana ny famoronana fiteny vaovao ny fifikirana @ tranainy. nefa mety hanavao ny fomba tranainy ihany koa !

Nampidirin'i Rajiosy @ 11:08, 2008-07-03 [Valio]

news2dago

rajiosy => enao rangahy mapihomehy foana marina e! hatrany ka hatraty! "rehefa miresaka aminao ny akama (maro) nanao fianarana kabary dia sahala @ ireny hangata-bady anao ry zalahy"

Nampidirin'i news2dago @ 12:11, 2008-07-03 [Valio]

News2dago> fandaharana ny any aminay iny lazainao iny ary lasa maka tahaka daholo koa ny rta sy ny tvm. Mahafinaritra tokoa izy iny aloha.
rajiosy> tsoriko fa ny tena nahatonga ahy ho finaitra tamin'ilay fifaninanana kabary dia ahitana fomba fiteny vaovao mihitsy ankoatra ilay efa atao hoe fandre. Izay no tena nampiavaka azy, mirona kokoa ho amin'ny famoronana aza. Lazaiko hoe tena samy manana ny hanitra ho azy mmihitsy ry zareo.

Nampidirin'i jentilisa @ 07:33, 2008-07-04 [Valio]

Ikalamako> amin'io fifaninanana kabary io anie ka ny vehivavy no maro an'isa na ny mpifaninana na ny mpikarakara e. vehivavy aza ny filohan'ny mpikabary eto Madagasikara araka ny fahalalako azy.

Nampidirin'i jentilisa @ 07:39, 2008-07-04 [Valio]

mahamlg

"Tsara ary tena ilaina ny fivoizana ny mahamalagasy noho ny fibosesiky ny kolotsaina vahiny", hoy ireo mpanabe sy mpampianatra. Maka io hevitra io koa aho satria efa manomboka mankadilo sofina ireo teny hoe "'lay toe-tsaina ! " sy ny hoe "'lay gasy ho' aho tenaaa..." izay atahorana ho tafiditra ao anaty ny kolontsaitsika kon'koa raha tsy mandray fepetra dia ny izao. Isaorana tokoa ireo mpamelona fandaharana TV milay voalaza ato ireto sy ny tompon'ny blog

Nampidirin'i Sitraka @ 13:04, 2008-12-21 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2019 »
Ah At Ta Ar Ak Zo As
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            
Tahiry
Credits
LifeType IE7 XHTML CSS Firefox