« | »

Soloky mihamahazo laka

2007-05-18 @ 17:08 in Andavanandro

Resaka andavanandro eto Iarivo ihany ity lazaiko etoana ity. Maro karazana ny soloky fandre sy fahitantsika fa misy endrika mbola tsy fandreko loatra no holazaiko eto izao. Ity dia tsy maintsy misy namana ny mpanao azy ary ny mpivarotra ihany no tena asiany voalohany.

 Eto amintsika moa dia atao hoe tsy ampy loatra ny vola madinika hany ka any am-pivarotana no manakalo vola ny sarambambem-bahoaka. Eo amin’izay no idiran-dry zalahy amin’ny solokiny. Mody manakalo vola tokoa ry zalahy. Amin’ny ankapobeny dia vola vaventy hatrany no entina. Ny tena fanaony aza moa dia ny Ar10.000 no tiany atakalo ho roa fotsiny izany hoe Ar5000 roa no tadiaviny. Matetika dia tsy manome olana amin’izany loatra ny mpivarotra rehefa hitany fa tena vola io vola atakalo io.

 Fa eo indrindra no ivoahan’ny haratsian-dohany. Olona roa hatrany no mifanakaiky eo, ny iray no mitondra ny vola atakalo moa ny iray tahaka ireny olona tsy fantany ireny na manao zavatra hafa « donendrinendrina » mitakisikisina amin’ilay namany eny. Raha vao manakalo (na mamerimbola be ihany koa !) ilay mpivarotra dia vetivety ny vaventy iray dia ifanakalozan’izy mirahalahy eo (efa nianarana mihitsy !). Tonga dia miteny ilay ranamana manakalo vola avy eo hoe mbola tsy ampy ity vola nomenao ity. Raha tsy efa mailo na efa tratra indray mandeha tsy mahita ny fanaovana azy.

 Fanaon’ny efa zatra ny miteny hatrany hoe Ar10.000 ity volanareo ity an ! sady mipetraka eo ambony latabatra ifanatrehana ihany ny vola. Dia miteny indray avy eo hoe ireto Ar5000 roa ary takalony. Tsy mahita holazaina ry zareo amin’izay fotoana izay. Izay ny traikefa mahazatra fa mety mbola hitohy ny raharaha amin’ny sasany.

 Mody miamboho kely ny mpivarotra indray izy. Eo anelanelan’izay fotoana izay indray efa niova vola sandoka mandehandeha be eto amin’ny tanàna ny iray amin’ny vola vao natakalo teo. Dia mody mitodika indray izy manao hoe aleo atao tokana ihany fa manahirana izy izany…amin’io fotoana io dia tsy mandray ny vola intsony ny mpivarotra fa mamaly hoe rehefa nanakalo ianareo dia tsy misy averina izany intsony fa ento any iny. Raha mandray manko ka miteny ny mpivarotra avy eo hoe tsy izy ity vola ity dia hamaly izy hoe iny ihany ny vola nomenao teo koa inona indray. Mety ho sarotra ho an’ny mpivarotra ny hamaly azy amin’izay fotoana izay ka ny tsy manaiky ny hamerenana ihany no fanafodiny.

 Zavatra mety ho tsotsotra ihany izay nambarako izay nefa noho ny fahitako ilay mpangataka isan’alahady eo ambavahadim-piangonana mamolava izay lasa naman-dry zalahy mpisoloky ireto no nanoratako azy etoana. Mety ho lamaody manko ny fanaovana ity soloky mbola tsy fandre loatra ity izay mety ho efa tany an-tsain’ny mpanao ilay fandaharana « Aleo hihomehezana fotsiny » ( inona ary izany?) amin’ny teny frantsay izay mamandrika any Quebec matetika afaka kelikely eo !

Hevitra

Tonga ny filoha

Androany hariva tamin'ny 5 ora sy sasany no nigadona teny amin'ny seranam-piaramanidina teny Ivato ny filoha Ravalomanana.

Tahatahaka ny masiaka ihany ny teniny miteny hoe raha toa tsy mahafaly na tsy mampety ny masoivoho sasany ny lalàna misy eto amin'ny firenena dia mahazo mangoron'entana mody ihany koa izy.

Tatitra nataon'ny mpanao gazetin'ny mbs radio moa io fa dia ho hitan'ny be syny maro ny fomba nitenenany izany!

Nampidirin'i jentilisa @ 17:25, 2007-05-18 [Valio]

tonga ny filoha.

Hay izay ny teniny ry jentilisa !
Vao aninenkeo koa izahay no nampitaina vaovao fa nolavin'ny fanjakana malagasy koa ny fanendrena ny "consul honoraire" italiana any amintsika. Italie manko dia any Pretoria no masoivoho misahana an'i Madagasikara, ka ireo teratany italiana eo amin'ny 2000 monina ao Madagasikara dia mba niady mafy nanomboka tamin'ny taona 2000 ny hisokafan'ny masoivohon-drizareo any, ary tamin'ny volana janoary teo dia nanaiky ny filatsahan'andriamatoa Ruffin Kaimane ho consul any ny fitondram-panjakana.
Kanefa tamin'ny volana avrily teo dia nanoratra ho an'ny Fikambanan'ny Italiana monina ao Madagascar izy fa "noho ny antony tsy fantany akory dia nofoanan'ny (annuler) fitondrana malagasy izany fanendrena azy izany". Ka asa re, tsy hay raha ambara !

Nampidirin'i ikalamako @ 18:40, 2007-05-18 [Valio]

ny Soisa ihany koa

Araka ny gazety iray novakiako androany sabotsy dia "tsy nanaiky nihaona" tamin'ny solotenam-panjakana Soisa ihany koa ny lehilahy nefa voalaza fa ny filoha hoe no nangataka fihaonana!

Misy ahitsy kosa angaha ny soratro fa ny izy dia hoe raha misy miteny hoe te-hanontany na hoe malahelo momba ny raharaha politika an'ny Malagasy. rehefa tsy mahay mipetraka izy dia mahazo mangorona entana ihany koa!!!

Nampidirin'i jentilisa @ 09:10, 2007-05-19 [Valio]

Teratany soisa maty nisy nitifitra

Sao dia tsy te hifanazava ny momba ity izy>> Gazety Taratra - Alarobia 16 May 2007

Nampidirin'i tomavana @ 10:57, 2007-05-19 [Valio]

Samy Soisa

Olana lalina mety idiran'ny politika any ambadika any io vonoan'olona io. Efa misy mahafantatra manko ny fanaon'ny Soisa indrindra fa raha nahafantatra ny fihavian'ilay vahiny ny namono.

Momba ny raharaha Walter Arnold kosa indray dia nifanenjana tamin'ny tsy fitoviam-pijery ny roa tonta dia ny malagasy sy ny soisa. Ny malagasy niahiahy voalohany indrindra ilay mpiray tanindrazana tamin'ilay novonoina sady mpiara-miasa taminy rahateo. Tsy nety nanaiky izany ny fitondrana Soisa fa heveriny ho jiolahy malagasy no namono. Samy nidrikina ny roa tonta tamin'izay fotoana izay.

Nampidirin'i jentilisa @ 11:17, 2007-05-19 [Valio]

Tsirambina

Ny aty Soisa ny fanadihadiana sy ny porofo no mialoha ny fiampangana, fa tsy miampanga aloha dia avy eo mitady porofo :(
Amin'ny maha-PMA [firenena isan'ny mahantra] an'i Madagasikara dia tokony tafiditra ao anatin'ireo firenena mahazo laharam-pahamehana amin'ny fanampiana Soisa isika saingy nihena antsasany izany nohon'ny tsirambin'iny raharaha iny
« Madagascar a perdu son statut de pays prioritaire, le budget a été réduit de moitié et la société civile retenue comme partenaire exclusif », Département fédéral des affaires étrangères suisse [eda.admin.ch >>].

Nampidirin'i tomavana @ 11:40, 2007-05-19 [Valio]

mopera vaky damozana

io ary ilay mopera vaky damozana, samy miala.

milaza fa tsy tia vazaha nefa mbola milantolanto mitady vola avy amim-bazaha.

aiza izy izany ragôva à?

Nampidirin'i ANJELY @ 19:18, 2007-05-21 [Valio]
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Novambra 2019 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox