« | »

Fifidianana sefom-pokontany hoe?

2007-05-21 @ 08:16 in Politika

Samy manana ny fanonona tiany avokoa moa ny mpitondra rehetra rehefa manondro asa iray izy ka mifampiankina amin’ny fampandehanana ny asam-panjakana izany. Asa inona angaha no tsy nitiavany ny teny hoe filoham-pokontany ? Naleony angamba natao hoe sefo ilay izy fa tiany ho azy irery ny anarana hoe filoha. Raha nahatadidy ny teto an-tanàna dia efa saiky nosoloany teny hoe kartie ihany koa io teny hoe fokontany io, tahaka ny efa nanariany ny teny hoe firaisampokontany sy ny fivondronampokontany izay ny jeneraly Ratsimandrava no nametraka ny teny voalohany.

 Tsy any moa no tena idirana fa ny amin’ny fifidianana ity sefom-pokontany ity. Mahavariana amin’izy ity dia ny tsy fanatanterahana ny fifidianana azy amin’ny fotoana tokana. Samy manana ny androm-pifidianany ny distrika tsirairay, na kaominina tsirairay na fokontany tsirairay. Tsy misy fotoana raikitra fa dia araka izay mahavonona ny tompon’andraikitra any an-toerana angaha. Dia tahaka ny hoe samy manao izay tiany atao ny tsirairay. Fifidianana sahala amin’izao ve no hametrahana ny fototry ny fampandrosoana ?

 Manaraka izany indray dia samy manana ny fomba fifidianany ihany koa ny fokontany tsirairay, na kaominina tsirairay, na distrika tsirairay. Ny iraisana dia tsy misy ny lisitra avy amin’ny minisiteran’ny atitany fa izay lisitra ao amin’ny fokontany ihany no hanatanterahana ny fifidianana. Ny teto Antananarivo moa dia ny karam-pokontany no niasa (tamin’ny taona 2003 na 2004 izy iny fa tsy mbola nifidy sefom-pokontany ny eto tamin’ity taona ity).

 Tao anaty fivoriambem-pokonolona moa no nanatanterahana ny fifidianana ary silatsilaka taratasy no hanaovana ny safidy. Alohan’izany aloha dia asaina manolo-tena ny olona izay hirotsaka. Tsy misy mirotsaka amin’ny anaran’ny antoko fa amin’ny anaran’ny tenan’ny tsirairay avy ihany no hirotsahana. Rehefa izany dia omena laharana ireo olona ireo ary asaina milahatra eo anoloan’ny biraom-pifidianana. Mitazona baoritra misy ny laharany avokoa ny kandida tamin’izany fotoana izany. Tsy ny anaran’ilay olona no apetaka ao anaty taratasy fa ny laharana mipetaka eo amin’ny baoritra. Tsy nisy vata manokana ihany koa fa satroka (tsy mandainga aho na mivazivazy fa tena izany mihitsy tamin’ny taona nolazaiko teo io) no nandrotsahana ny vato.

 Amin’ny mahafivoriambem-pokonolona azy dia fotoana fohy ihany no nanatanterahana ny fifidianana. Izay efa eo no manatanteraka azy. Io angaha no nahatonga ilay filazana hoe rehefa tsy mahatratra ny atasa-manilan’ny olona ampy taona ny olona nifidy dia tsy manankery ny fifidianana ka miantso fivoriambe manaraka indray ka any amin’ny fivoriambe fahatelo dia ekena hatrany ny latsabato na dia tsy mahatratra ny fetr’isa aza. Izay ny tamin’izany fotoana izany. Tsy fantatra moa hoe maharitra hafiriana ny fepotoam-piasan’ny sefom-pokotany fa ny fahalalako fotsiny no milaza azy ho telo taona, ny voafaritry ny lalàna mbola hofantariko aloha.

 Fa ny tany Toamasina nampitain’ny namana iray no nahavariana ihany koa. Vao omaly manko no notanterahina ny tany. Ny taratasy fiantsoana no nentina nifidy. Talohan’izay dia nanontaniana hoe misy olona firy ny ampy taona ato…dia soratana iny. Dia tsy nisy lisistra araka izay nolazaiko teo ny fifidianana fa iny taratasy fiantsoana iny no karazana kara-pifidianana. Raha izany aho no nanao dikantsary iny taratasy iny izany dia nomeko ny namako dia afa-nifidy koa izy araka ny nambarany. Fa izany eo ihany fa dia nopetakana ranomainty sarobonoina ihany ny ankihibe rehefa vita ny fifidianana. Inona ary ity voraboraka hentitrentitra ity ? Dia ara-dalàna ve izany ity fifidianana ity ? Ahiako tsy mandalo Fitsarana avo momba ny Lalam-panorenana ihany koa manko ! Sa andeha atao hoe ara-panjakana na dia mety ho tsy ara-dalàna aza.

Hevitra

>Sa andeha atao hoe ara-panjakana na dia mety ho tsy ara-dalàna aza

Ha, ha, ha, ka voasary tsy an-tànana tsy atolo-jaza koh. Midera ny fitadiavana vaha-olana système-D ny Malagasy aho :)

Nampidirin'i tomavana @ 09:01, 2007-05-21 [Valio]

amiko kosa aloha mety ho samihafa kosa ny lanjan'ny teny hoe FILOHAM-pokontany sy ny hoe SEFOM-pokontany. Na ekeko aza fa samy "anaram-boninahitra" ireo, ny hoe "filoha" dia mety afaka mijanona ho satro-boninahitra monja ihany toy ny tendro amin'ny fikambanana maro samihafa izay manazava ny fisian'ny rafitra an-tanatohatra (hierarchie moral) eo amin'ilay andian'olona.
Ny hoe "sefo" kosa, tonga dia mitarika fijery hoe "hetsika na andraikitra voafetra sy voafaritra". Io angmba amiko no mahadika kokoa ilay antsoina hoe leadership, ilay fahaizana ho lehibe mpitarika sy mampihetsika ny zavatra rehetra, na mandrindra izany na mamorona hevitra ahafahana mihetsika.
Ataoko hoe efa rafitra mipetraka ho an'ny daholo be eran-tany kosa ny mahatonga ny hoe Filohan'ny Repoblika ka tsy andeha hamadihana azy ho sefon'ny repoblika raha tsy hoe handeha hitari-tafika hanafika firenena hafa angaha.
Asa raha mazava ilay nuances mba tiana nampitaina.

Nampidirin'i rajim @ 13:41, 2007-05-21 [Valio]

Fahazoako azy

Izany hoe raha jerena amin'izay lazainao izay dia tsy tian'ny filoha hisy voninahitra kokoa ny "sefo"?

Ny filoha manko dia mandalo fa moa toy izany ihany koa ve ny sefo eo amin'ny resaka asa? Dia mandra-pahoviana izy izany no sefo? eo ilay fanontaniana!

Nampidirin'i jentilisa @ 15:11, 2007-05-21 [Valio]

Filoha sa sefo

Taloha koa ange izahay toa niantso hoe "ingahy lehiben'ny fokontany" e ! Sa tsy mahafaritra ny adidiny koa io ? Teo koa ny Ben'ny tanàna izay tsy fantatro na mbola fiantso ny maire amin'izao fotoana. Ilay sefo manko ange teny frantsay nadika maimaika fotsiny fa tena azo esorina raha ananantsika ny teny afaka milaza izany amin'ny tenin-drazantsika e(raha tena vonona hitandro ny teny malagasy). Indrindra fa raha ity fitondrana "tsy dia tia" frantsay ity, tokony ho natao tsifom-pokontany izany (avy amin'ny "chief") sa manjary mifangaro koa amin'ny chief of staff-n'ingahilehibe - ingahy filoha manko e !
Dia aoka re fa dia hahavalalanina izy ity. Ilay fifidianana izao ohatra ny nifidy chef de classe tany am-pianarana koh, lol

Nampidirin'i ikalamako @ 18:42, 2007-05-21 [Valio]

Nolazaiko hoe samy anaram-boninahitra hoy aho ireo roa ireo. Fa rehefa hoe filoha, seza fiandrianana no tonga an-tsaina voalohany ; mibaiko fa tsy mihetsika. Rehefa hoe sefo kosa, mpitari-tafika mitantana ny fanatanterahana no misongadina voalohany.
Averiko kosa anefa fa raha ankehitriny dia sefom-pirenena na sefom-panjakana izany no misy. (ny teo aloha dia filoha). Saingy ohatra ny mety mankarary sofina ny mandre izany mihoatra ny hoe filoham-pirenena nahazatra.
Eritreritra ny anay fa tsy hoe mitoky tena ho manana ny marina akory.

Nampidirin'i rajim @ 17:12, 2007-05-22 [Valio]
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Aogositra 2019 »
Ah At Ta Ar Ak Zo As
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31
Tahiry
Credits
LifeType IE7 XHTML CSS Firefox