« | »

Omeo teny gasy mihitsy

2007-05-31 @ 15:41 in Andavanandro

Nisy mpitondra fiarakodia niresaka fa dia tahaka ny manao mizana tsindrian’ila ihany ny mpitandro ny filaminana indrindra fa ireo misahana ny fifamoivoizana eto Antananarivo. Raha manao fahadisoana ny malagasy dia mihazakazaka aoka izany ry zalahy amin’ny fanatonana ny mpamily ary mitaky ny taratasy sy ny manome sazy. Fa raha vahiny (ny hatsatra mazava loatra) na eo imasony eo aza no manao fahadisoana dia tsy sakanan-dry zalahy mihitsy fa tazaniny tahaka ny flaorà jeren’ny omby fotsiny.

 Misy ny fitaratra ijerena any aoriana no faohin’ilay fiara, ilay mpamily miresaka amin’ny finday ao anatin’izany ary tsy mahalala ny hijanona mihitsy na dia hitany izao aza ny nifaohany ny fitaratry ny olona. Fantany manko fa tsy sahy hanakana azy ireo polisy ireo. Tezitra ny Malagasy mahita izany dia mivazavaza amin-dry zalahy hoe jereo ny zavatra nataony dia nojerenareo fotsiny. Amin’io dia ry zalahy indray no manangam-bovona amin’ny tsy fanajana manam-pahefana. Rehefa tsy manaiky hanome ny taratasy mihitsy ilay saofera Malagasy dia miezaka ny mandamina amin’ny hoe efa hitantsika iny ny fiara dia efa hitantsika ny nomeraony dia tsy hitako intsony izay olana fa azo antsoina hatrany ireny. Tsy manaiky izany valinteny izany ilay mpamily Malagasy ka niteny izy fa hakariny ho amin’ny sehatra ambonimbony kokoa ity raharaha ity.

 Inona no azo tsoahina amin’izany ? Azo heverina fa mihevitra ny tenany ho manan-danja afaka manao izay tiany hatao aloha ilay vahiny. Manana andraikitra ambonimbony any amin’izay misy azy angaha ka heveriny ho antsojay ataon’ny malagasy aminy mampihemotra mpandraharaha raha vao miseho hanembatsembana azy. Mety ho manana olona ambony fantany hanavotra azy ihany koa amin’ny raharaha « tsy dia misy dikany » sahala amin’izay notantaraiko teo. Tombatombana azo disoina ihany ireo noheveriko voalohany ireo fa mety ho zavatra hafa no tena antony. Io zavatra hafa io dia manakana ny fifandraisana eo amin’ny vahiny sy ny teratany. Ny olana dia tsy ny vahiny eto no miezaka hahay ny tenin’ny teratany fa ny mifamadika amin’izay no mpiseho. Ny antony dia efa nisy fotoana nanjanahan’ny vahiny antsika Malagasy. Ry zalahy manampahefana misolo tena ny malagasy anefa mety ho tsy havanana loatra amin’ilay teny vahiny ka tsy te-hanala-bara-tena amin’ny fibadabadana eny. Dia aleony manao izay tiany atao eny ireny vahiny ireny. Ireo mahay teny vahiny ihany no hahasahy hanakana an-dry zalahy fa vitsy ihany izany araka ny fahitako azy aloha. Mihevi-tena ho toy ny ambany manko raha tsy mahay ilay teny vahiny (afa-tsy oui m’sé).

 Dia lasa ny eritreritro manao hoe f’angaha dia tsy maintsy ny teniny no iresahana eto amin’ity tanàna ity ? angaha koa ianao any amin’ny biraony ka matahotra ny hiresaka na hibetroka azy mihitsy aza ? Raha menatra ny hiteny vahiny aminy (izany hoe haja ve izany ny miteny vahiny aminy sa tsy mahatonga azy ho kamo hianatra ny teny malagasy ?) maninona raha mibetroka azy amin’ny teny gasy fotsiny amin’izao. Izay ilay hoe omena teny gasy izy. Aleo izy indray no hihanahana fa raha mitaky permis aminy dia ny teny hoe permis ihany no atao teny vahiny fa ny ambiny rehetra atao amin’ny teny malagasy. Dia mety hiteny isika hoe ka teny ofisialy eto anie ny teny frantsay sy teny anglisy e ! dia valiako hoe marina izany fa tsy manakana ny malagasy hiteny malagasy izany. Avelao hisy mandika teny ho avy e ! f’angaha dia ny hamalifaly azy izao foana no hatao ? Ianao angaha raha any aminy ekeny izay teny malagasinao fa ny teniny ihany no iresahany aminao dia mba toy izany ihany koa e ! Toa isika indray no hisahirana aminy nefa izy ary mandika lalàna…

Hevitra

Ekeko antsakany sy andavany raJentilisa a!

"Andrianiko ny teniko ..." hoy ilay ohabolana iray izay.

Ka omeo ny teny gasy tokoa ny olona ohatra izany e! Maromarò ny olona tahaka an'i Jentilisa fa hametraka ny teny malagasy amin'ny tokony ho toerany!

Nampidirin'i Tokinao @ 21:18, 2007-05-31 [Valio]

Ny vahiny sy ny mpitandro filaminana aty Saigon...

Vahiny aty Saigon aho, mitovy amin'ny vazaha any amintsika.

Tsy manakana vahiny mihintsy ny mpitandro filaminana aty satria matetika tsy mahay miteny anglisy na frantsay ry zalahy. Indrindra moa fa teny gasy !

Manao tsy mahazo resaka fotsiny ilay vahiny dia afaka satria lany fotoana eo aminy eo fotsiny ilay ranamana. Fotoana ahafahany manakana olona hafa sy ahafahany manao rakitra (aty mantsy tena mandeha be ny rakitra... ninoninona atao, rehefa mahalala fomba tsy misy olana :-))

Izaho vahiny kosa aloha tsy mety sakanana raha ohatra manao tahaka ahy aby ny olona, tsy mijanona amin'ny "feu de signalisation" ohatra, tsy mazava ny lalàna... ary tsy mazoto koa aho hanao rakitra, rehefa voasakana aho dia miteny gasy, vetivety dia leo ry lerony dia avelany mandeha aho...

Eo amin'ny fifamoivoizana ihany no afaka ny vahiny, fa raha amin'ny resaka hafa, toy ny fanondranana zava-mahadomelina, mitovy ny sazy, hatramin'ny fanamelohana ho faty...

Raha ny hevitro dia tsy misy ifandraisany amin'ny fanjanahantany ny tsy fanajanana lalàna. Marina fa misy ny vahiny manao tsinontsinona.

Tsy nanjanaka ny vietnam ny gasy akory. Fa ny lalàna no tsy milamina ka manararaotra ny daholobe !

Rehefa mazava, sy tsy voavidimbola, ny lalàna dia azo ampiharina amin'ny olona rehetra tsy ankanavaka !

Nampidirin'i elsifaka @ 07:28, 2007-06-01 [Valio]

Misy ihany ny ezaka eto

Raha ny eto Antananarivo amin'izao fotoana izao dia efa sarotra ny hanao rakitra aloha. Ny ampahibemaso no tena tiako lazaina fa ny any ambadika any no tsy fantatro. Izay indray no mahasamihafa ny any sy ny aty, tonga dia dradradradrain'ny olona amin'ny radio ny nomeraonao raha vao manao kiliolio ianao. Ny polisy anefa efa nomena "tag" misy ny sariny sy ny laharany avokoa. Ny toerana ametrahana azy rahateo efa nanendrena azy hanao ny asa.

Ny eto Antananarivo mihahenjana be ny lalàn'ny fifamoivoizana na dia mbola mahasisika sy mahatsofotsofoka ihany aza ny taxibe te-ho tonga haingana amin'izay alehany.

Ary ny mampihomehy amin'ny rakitra anie dia ilay "kolikoly" no lafo kokoa noho ny fandoavana ny sazy matetika e! Raha polisy vavy izany no tadiavinao sisihana Ar5000 ohatra dia mety ho voaompa mihitsy ianao. Angaha, hono, izy makorelina no izany ihany no omena azy.

Raha hanao ihany manko aleony mikapoka mafy toy izay mikapoka mora ndrao tratran'ny bianco tampoka nefa kely fandray vola.

Misaotra indrindra nampita ny zavamisy any Vietnam aloha!

Nampidirin'i jentilisa @ 08:17, 2007-06-01 [Valio]

"maninona raha mibetroka azy amin’ny teny gasy fotsiny amin’izao. Izay ilay hoe omena teny gasy izy." ka tandremo aza sao entim-po be dia mandeha mbakan'ny ompa gasy be eo :-)))

Nampidirin'i Rajiosy @ 21:01, 2007-06-01 [Valio]

Ny loza aza!!!

Tahaka ny zavatra nosoratan'i Elsifaka tany amin'ny Malagasy Miray any fa ny 80%n'ny teny ifampiresahana any amin'ny firenena ipetrahany amin'izao fotoana izao dia teny ratsy sy ompa avokoa...

Ny vazaha eto amintsika koa mampihomehy fa ny teny ratsy sy ny ompa no hainy voalohany eto amintsika. Ny hitako aloha

Nampidirin'i jentilisa @ 09:32, 2007-06-02 [Valio]
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2018 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox