« | »

Akon'Iavoloha

2008-01-04 @ 10:48 in Politika

Araka ny efa fantatry ny mpanara-baovao dia androany maraina naroso tamin'ny 9 ora ny fifampiarahaban'ny mpitondra fanjakana amin'ny solombavambahoaka sy ny ny Ben'ny tanàna. Mazava loatra fa tany amin'ny lapam-panjakana Iavoloha no nanaovana izany fifampiarahabana izany. Dia lazaina mialoha eto fa teo amin'ny fitoerana voalohany no napetraka ny Ben'ny tanànan'Antananarivo mivady na dia tsy sisiny loatra aza izany.

Manaraka izany noho ny asa dia tsy naharaka tsara aho na dia te-hampita antsipiriany ny zavanisy tao aza. Misy ihany koa anefa ny tsikaritra tanatin'ny asa. Ny kabary re voalohany dia ny an'ny filohan'ny antenimieram-pirenena Atoa Jacques Sylla. Fifampiarahabana moa ka tsy maintsy firariantsoa no manjaka. Mazava loatra fa tiany hanandanja ny firariana "hiaina amin'ny fandriampahalemana" sy "hiasa anaty filaminana" ny vahoaka. Mitohy avy eo moa ny fampandresen-dahatra fa anaty fanatontoloana isika ka mifampiankina anaty sehatra iraisam-pirenena avokoa ny zava-misy rehetra, toy ny fiakaran'ny vidin'ny solika, ny fitsarana ady heloka bevava ary ny tany mihamafana.

Ny Praiminisitra avy eo no nikabary ka nilaza tsotsotra ny vitan'ny governemanta. Tao moa no nahenoana hoe nihena 38% ny tahan'ny heloka bevava raha oharina tamin'ny taona 2006. Teo koa ny filazana fa tafaverina amin'ny tompony ny 75%n'ny omby nangalarina. Teo koa no nilazana fa hakarina ho 60 000Ar ny fanampiana ho an'ny mpampianatra FRAM na mpampianatra iantohan'ny ray aman-drenin'ny mpianatra ka mba manao fanampiana ihany koa ny fanjakana foibe.

Nanaraka ny kabary na anatin'ny kabary moa no nanateran'ny olombaventy sy solontenam-paritra isankarazany ny solombodiakoho. Anisan'ny nanolotra izany tamin'ny filoham-pirenena mivady ny Ben'ny tanànan'Antananarivo sy ny solontenan'ny isam-paritra. Narahina fanomezana santa-bary avy amin'ny isam-paritra 22 izany satria "ny akoho laoka ampiarahana amin'ny vary" hoy ny kabarin'ny filoham-pirenena. Miteny faritra ihany dia tsara ny milaza hoe nihofahofa teny amin'ny sehatra avokoa ny fanevan'ny faritra 21 (sarin'ny armoirie) fa ny an'ny Haute Mahatsiatra no "tsy misy saina" tsy nahatonga ny azy, drapeau no tiako lazaina hoy ny filoha izay. Ny tsikaritra hafa ihany koa dia ny nampitodihana tamin'ny mpanatrika ny osy iray rehefa hikabary ny filoham-pirenena. Kely ny hanin'ireny dia efa mahavokatra ronon be, hoy ny filoha nandritra ny kabariny.

Nandritra ny kabariny tokoa ny filoha dia nilaza fa be ny asa vita saingy be ihany koa asa miandry. Ny 75%n'ny malagasy manko no mbola mahantra. Nolazain'ny filoha amin'ny zay ny laharam-pahamehana telo hotanterahin'ny governemanta mandritra ny taona 2008. telo aloha hoy izy fa tsy valo.

1- Hampitombo ny harin-karena (fampandraisana anjara ny mpandraharaha sy ny mpanao asa tanana malagasy) satria tsy hisy fandrosaona izany raha tsy mitombo io harinkarena io.

2- Fanamafisana ny fampandrosoana ny eny ambanivohitra.

3- Fampihenana ny fahantrana

 

Ny tanjona kendrena manko araka ny filoha dia ny hahatrarana ny harinkarena ho 7 na 8% any ho any. Avy eo moa dia nampitenenin'ny filoha hamelabelatra ny zavamisy ankehitriny ny minisitra Ivohasina Razafimahefa. Lavalava ihany io kabary fanavazavana io fa miaraka amin'ny tabilao sy voarakitra an-tsoratra moa ka tsy nahamonamonaina loatra. Ny nomarihana sady efa fantatsika ihany dia 580 000 000€ no azo tamin'ny firaisambe Eoropeana ary 700 000 000$ kosa indray no azo avy tamin'ny banky iraisam-pirenena hanatanterahana ny MAP. Ny faharoa dia raha 475 000Ar n harinkarena isam-batan'olona tamin'ny 2006 dia tafakatra ho 628 260Ar kosa izany tamin'ny taona 2007. Ny tahan'ny fahantrana kosa raha 80.0% tamin'ny 2002 dia nihena ho 67.5% kosa izany tamin'ny 2006, mbola eo ampikajiana fa mbola mihena io hoy izy.

Ary ny nomarhinia farany dia hisy fifaninanana ho an'ny Kaominina rehetra ka ny valin'ny fifaninanana dia holazaina amin'ny 10 novambra 2008 any amin'ny lapam-panjakana eny Iavoloha ihany. Asa mety mbola hisy hosoratana ve?

Hevitra

O ry zareo ah! misy lahatsoratra nadikako izany tany amin'ny globalvoices any e! poezia ilay izy dia asa rah amba azo ihafiana ny dikanteny nataoko! mba somary tsarao kely hoe ry zareo! tsindrio io jentilisa amin'ny filazana ny hevitra io e

Nampidirin'i jentilisa @ 12:27, 2008-01-04 [Valio]

Arabaina i Jentilisa. Ny fitantaranao no tonga voalohany. Raha hiandry ny gazety dia mbola rahampitso vao hahita ny vaovao. Koa mankasitraka hatrany amin'ny fandavan-tenanao hampahafantatra ny zava-mitranga toa voatantara mivantana mihitsy. Bon week-end ary e!
Nampidirin'i Su @ 12:35, 2008-01-04 [Valio]

Arabaina i Jentilisa. Ny fitantaranao no tonga voalohany. Raha hiandry ny gazety dia mbola rahampitso vao hahita ny vaovao. Koa mankasitraka hatrany amin'ny fandavan-tenanao hampahafantatra ny zava-mitranga toa voatantara mivantana mihitsy.

Bon week-end ary e!

Asa na naninona fa tsy nahazo lalana hijery eto amin'ny bolongan'i Jentilisa indray aho teo.

Nampidirin'i Su @ 12:42, 2008-01-04 [Valio]

Aiza no handefasana ilay fitsarana? Efa nanao kelikely ihany mantsy aho.

Nampidirin'i Su @ 14:34, 2008-01-04 [Valio]

Hitan'i Su, rehefa avy mamaky eto ianao ka lavalava ny fotoana namakiana azy dia actualiser-o aloha ny site. Io moa ilay fiteniko hoe ankotriho. Mino aho fa tonga dia lasa ny soratra avy eo

Nampidirin'i jentilisa @ 15:58, 2008-01-04 [Valio]

Dia teo amin'ny toerana nahitanao azy ihany raha azo atao e!

manaraka izany indray dia tsy bolongana ny bolongana (blaogy) raha toa ka amin'ny ora ivoahan'ny gazety koa no ivoahan'ny vaovaon'ny bolongana raha azo atao koa.

Nampidirin'i jentilisa @ 16:09, 2008-01-04 [Valio]

Miarahaba,

Misy zavatra tsy azoko tsara ny @ voasoratra :

- voalaza fa : >

- dia avy eo ambara indray fa : >

ka iza no tena marina : ilay 75% ve sa ilay 67.5% izay mbola mihena ?

Nampidirin'i Shadow @ 18:25, 2008-01-04 [Valio]

Nisy nilatsaka ny fehezanteny tiako nosoratana ka averiko manontolo :

- voalaza fa : " Nandritra ny kabariny tokoa ny filoha dia nilaza fa be ny asa vita saingy be ihany koa asa miandry. Ny 75%n'ny malagasy manko no mbola mahantra. "

- dia avy eo ambara indray fa : " Ny tahan'ny fahantrana kosa raha 80.0% tamin'ny 2002 dia nihena ho 67.5% kosa izany tamin'ny 2006, mbola eo ampikajiana fa mbola mihena io hoy izy. "

ka iza no tena marina : ilay 75% ve sa ilay 67.5% izay mbola mihena ?

Nampidirin'i Shadow @ 18:27, 2008-01-04 [Valio]

Ny Filoha no nilaza ilay 75% ary ny minisitra Ivohasina indray no nilaza ilay 67%. Izay no nanoratako azy roa ireo satria samy mpitondra fanjakana ihany izy ireo.

Ny an'ny filoha ny fijeriko azy dia karazany nampitovy ny isanjaton'ny tantsaha amin'ny isan'ny mahantra. Ny Minisitra indray namaky teny izy nikabary nefa toy ireny tsy namaky teny ireny mihitsy ny fomba fiteniny. Io Minisitra io angamba no tiany handimby azy sa tiany ho praiminisitra vaovao?

Nampidirin'i jentilisa @ 07:24, 2008-01-05 [Valio]

Tsy mety ilay anakotrihina an'ilay site. Tsy te-hanova izay voasoratrao mivantana ihany koa aho fa ataoko fa mety raha ianao no manova azy raha tianao izany. Handefaso imailaka aho dia adikako ao amin'ny valiny ny "suggestions"-ko.

Nampidirin'i Su @ 12:21, 2008-01-05 [Valio]

Raha mety ary dia ao amin'ny I-shalom-oana (tadiavo google) manoratra dia asio adiresy ao fa ny eto tsy ahitana ny adiresin'ny mpanome hevitra, tsy haiko manko ny adiresinao e!

Nampidirin'i jentilisa @ 16:02, 2008-01-05 [Valio]

Tokony hatao mifampitohy ny kabary isan-taona o?
Le kozin'i Herizo no tiako tenenina hoe alohan'ny hilazana ny hatao @ ity taona ity dia mba ny evaluation an'ny natao t@ taon-dasa, mihoatra @ kabary natao t@ iny no lazaina...
Norma ihany alou fa tsy nolazain'lery t@ herin-taona mintsy hoe atao t@ 2007 ny ankamaroan'ny fifidianana e, tsy hita izay hilazana azy avy eo...

Nampidirin'i simp @ 18:59, 2008-01-05 [Valio]
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Oktobra 2019 »
Ah At Ta Ar Ak Zo As
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    
Tahiry
Credits
LifeType IE7 XHTML CSS Firefox