« | »

Barea Madagasikara: Izay tsy itovizako hevitra amin'ny rehetra

2008-06-18 @ 10:01 in Spaoro

Raha miteny hoe rehetra aho eto dia izay naneho hevitra ka reko na natrehiko mivantana ny nilazany azy. Matoa koa manoratra dia hilaza izay tsy fitovian-kevitra izay. Angamba izaho no tsy maharaka ny resaka baolina mihitsy na andeha mody atao hoe manivaka koa angamba aho ka izay no tsy itovizako amin'ny mpitia baolina fandaka hafa eto an-toerana (Madagasikara).

Na izany na tsy izany dia misy  ny ankasitrahana tamin'izay mety tsy ho tsikaritry ny besinimaro. Masiaka dia masiaka manko aho amin'ny resaka toerana ho an'ny mpijery. Ny hitako tamin'ny fahitalavitra aloha dia feno ara-dalàna ny fijerem-baolina. Tsy misy olona mijorojoro intsony eny amin'ny lalantsara, fahazarana iray mba voailika aloha izay tamin'iny indray mitoraka iny ary irariana ny hitohizan'izany fanatsarana izany. Ny faharoa dia tsy misy midongy mipetraka intsony koa eny amin'ny tohatra izay nolokoina fotsy ho hitan'ny mpanaramaso. Dingana efa tsara izany ho amin'ny fampivoarana ny fanajana ny mpijery sy fifanajana ihany koa. Ny tery ambony tery no tsy hitako loatra hoe mbola misy mijoro ve sa tsia? Efa tsy nahitana tongotra miraviravy koa moa izany ny gradin. Iny aloha efa matetika sorohina foana hatramin'izay afa-tsy raha tena hipoka ny kianja.

Ankoatra izay kosa dia nampalahelo tokoa izany fanimbana nataon'ny mpilalao Mozambikana tao amin'ny toerana fisoloana akanjo tao Mahamasina, ny seringue hita tao ihany koa ary ny fanimbana nataony tany amin'ny trano fandraisam-bahiny nivahiniany. Hita tokoa fa entina hanindriana mialoha ny fihavian'ny Malagasy any aminy ny zavatra ataony. Mampalahelo fotsiny dia hoe fa naninona azy ny Malagasy no ny fananan'ny Malagasy no potehiny nefa Afrikana Tatsimo (mpitsara) no nampalahelo azy tamin'ny fitsarana?

Ny hevitra iray lehibe tsy iraisako hevitra amin'ny maro indray dia ny nanakianana ny mpanazatra tamin'ny safidy hilalao tamin'ny alahady lasa teo. Nolazaina ary fa maro ireo mpilalao no tsy napetraka tamin'ny toerana mahazatra azy. Tsy tokony hoterena ho "polyvalent" ny mpilalao fa aiza kosa sanatrian'izany ny mpiandry tokonana no ho lasa mpanafika sns... Dia hoy aho hoe tena taraiky be koa izany fijerem-baolina malagasy izany. Izany hoe tsy mahay afa-tsy ny mandaka amin'ny tongotra ilany ve izany ireo nofantenana ho amin'ny ekipam-pirenena ireo? Eto izany no tena ahitana ny mahatratra aoriana antsika Malagasy hoy aho. Ny tena mpilalao tsy mifidy toerana ametrahana azy izany fa hainy avokoa io na dia misy aza ny toerana tena manavanana azy tokoa. Raha any amin'ny ilany havanana hatrany no misy anao dia mora ambenana any amin'ny havanana ianao izany fa ilaina ihany ange indraindray ny mivadika any amin'ny ilany havia mba hahafanina izay mpifanandrina miambina anao e!

Manakory moa ny tombony lehibe azon'ny mpilalao iray any amin'ny fiarovana ankavia manafika hatrany amin'ny ilany havanana ohatra? moa tsy very avy hatrany ireo izay mpieritreritra hoe izaho indray dia aty ankavanana foana nefa ho tratran'ny be noho ny vitsy raha misy ny fanafihana ataon'ny mpifanandrina amin'ny tena amin'izay lafiny izay? Inona moa indraindray no ahitana ny mampahay an'i Voavy Paulin? moa di ny fivadihana elatra indraindray eny? Ilaina mandrakariva araka ny fiheverako ny mampiomana ny mpilalao rehetra amin'ny toerana rehetra fa tsy toerana iray monja. Nivandravandra anie tamin'ny alahady fa tsy nisy nilana azy mihitsy ny afovoany (demi) rehetra. Ireo anefa no itarafana ny sady fahaiza-manafika no fahaiza-miaro... izany hoe ireo ve no itarafana fa asa tokana ihany no tadiavin'ny mpilalao malagasy? Tsy ny lohalaharana ihany no ilaina hamono baolina fa ny mpilalao rehetra eny fa na dia ny mpiandry ny tokonana (mpiandry tsatoby re!) aza. Sa tsy mbola tadidin'ny maro fa ny mpiandry tsatokazo hatrany no naharesy ny club M tamin'ny fotoana nifanandrina tamin'ny Ezipta rehefa natao ny tirs au buts?

Na dia havanana kokoa aza ny mpilalao tsirairay...ilaina hatrany ny mianatra mandaka sy mitifitra amin'ny tongotra havia... eny fa na dia handreraka aza izany. Ny mpilalao miezaka amin'izay no tena tadiavin'ny mpanazatra araka ny fiheverako azy. Misy koa anie ny lalao miverina hatehina ka mba paikan'ny mpanazatra ihany koa ny soamry mamitaka ny mpifanandrina amin'ny tena izay tsy tena mahalala ny ny mpilalaon'ny tena e! raha ekipa malaza isika ary fantatra any ivelany tsara avokoa ny mpilalaontsika dia mety ho hadalana izay fitaka izay saingy... iza amin'ny mpiondana baolina fandaka no tsy mahalala fa mpanafika ny toeran'i Essien nefa naninona izy no lasa tany amin'ny fiarovana rehefa tratran'ny karatra mena ny kapiteniny tamin'ny CAN 2008 iny? Fahadisoan'ny mpanazatra ve izay sa fanapahan-kevitry ny kapiteny vaovao sa... fanamarihana fa tena mpilalao goavana tokoa i Essien? Ambava homana, (ny maso mamaky) ampo mieritreritra, tompoko.

 

Hevitra

news2dago

Tsy dia misy antenaina intsony io barea io! tsy aleo koa ve izay toy injay miakatra eo ny rambon-dry zalahy federasiona oe mahavita azy!

Betsaka ny lesoka t@ ireny baolina ireny e! mitovy lasitra @ frantsa isika izao! mila miova ny rafitra

Nampidirin'i news2dago @ 11:24, 2008-06-18 [Valio]

Izaho indray tsy miditra amin'io hoe mila ovaina io ny rafitra ry news2dago. Efa im-piry moa isika no nanova rafitra fa ny teo ihany no teo? Amiko tsy ny rafitra no olana fa ny firaisam-pon'ny mpankafy no tsy misy, na maika loatra te handray anjara amin'ny CAN ny tsirairay ka samy mitaky miracle avy amin'ny federasionina.

Raha maniry ny hahita ny baolina fandaka handroso ianao dia tiavo araka izay mendrika azy izy aloha.

Ny tiako hahatongavana dia hoe: rehefa ireo aloha no lany teo, aleo izy hamita ny fotoam-piasany, raha tsy hoe ny nahim-pony angaha no mahatsiaro tena hoe mety hahavita tsara kokoa ny hafa. Rehefa tonga ny fifidianana manaraka, ataovy izay tsy hahalany azy intsony. Vitantsika eto amin'ity Firenena ity ve ny manome 100% ho an'antoko iray amin'ny fifidianana iray, dia hilaza ianao fa hoe na haverina in-jato aza ny fifidianana dia ireo foana no ho lany satria etsetra? Tsia, tsy sarotra velively ny mampiditra olon-kafa ao, amin'ny alàlan'ny fifidianana, raha izay no hita fa hampandroso zavatra.

Ary na iza na iza lany amin'ny fifidianana, fa izay moa no atao hoe Demokrasia, dia tokony hampian'ny ankolafin-kery rehetra.

Raha ny amin'ny hoe mihinam-bola fotsiny no ataon'ireo fa tsy miasa, ... andefaso Bianco dia alefaso any Antanimora raha hita fa nisy halatra tao e! Ry Pety sy Voninahitsy aza vitantsika ny nanadoboka azy.

Nampidirin'i DotMG @ 11:49, 2008-06-18 [Valio]

news2dago

DotMG => misy hitovizako hevitra @nao ihany fa ny tiako tsindrina kely fotsiny dia ny oe mila atao matotra tsara ny fifaninana nasionaly aloa! asina lalao mandroso sy miverina ary asina ambaratongany Div1, div2 sy ny sisa! tokony hanjaka tsara ny fifaninana aloa ary tokony hikarama ny boay kely milalao izany oe miasa izy izany fa tsy haitraitra oh ny @ izao fotoana izao!

Amporisihina izany ny faritra sy ny fivondronana na ny orisana lehibe handray anjara! ka eo no amaritana sy hitarafana ireo mpilalao tena tokony handrafitra ny ekipam-pirenena.

Aza adino fa nony nisy ny fanambazana "prime" dia tena nisy ny fifaninana be teo @ ireo mpilalao ary nahatsara zavatra izay! kanefa ilay toe-tsaina mbola tsy tena voataiza tsara ka lasa ady t@ ireo mpilalao indray ilay izy.

mila misy fiovana ihany raha te handroso e! de olona manana finiavana sy fitiavana no atao eo

Nampidirin'i news2dago @ 13:08, 2008-06-18 [Valio]

raha jerena izay 30 taona lasa izay dia hita fa tsy mahari-pery ny taranja kitra malagasy. mby aiza izao ireny klioba filamatra taloha ireny ? St-Michel, Fortior Majunga, Fortior Côte Est, MMM, Sotema, Corps Enseignant, Dynamo Fima, BFV, BTM ets (misy 2 na 3 t@ ireo tonga 1/2 finale sy 1/4 de finale tany Afrika tany). indrisy toa efa fahatsiarovana no sisa !

misy klioba fanta-daza any Afrika hatramin'ny ela : Espérance de Tunis, Hafia de Conakry, ASEC Abidjan, Zamalek,...

marina ny an'ilay razoky etsy aloha : mila rafitra ary rafitra maharitra ny fotibaolina malagasy (ny rapida azo hiafiana @ io lafiny io :-)

Nampidirin'i Rajiosy @ 18:39, 2008-06-18 [Valio]

ny manahirana anie misy ny orinasa miezaka ny hanangana ekipa dia miroborobo vetivety avy eo mitsipozipozy! ny mpilalao avo lenta mihitsy ve no tsy misy eto Madagasikara?

enga anie mba haharitra ela ny fampiofanan'ny Adema!

Nampidirin'i jentilisa @ 07:55, 2008-06-19 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Janoary 2020 »
Ah At Ta Ar Ak Zo As
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31  
Tahiry
Credits
LifeType IE7 XHTML CSS Firefox