« | »

Efa nosiahan'ny Malagasy ihany koa ny La Marseillaise

2008-10-19 @ 18:06 in Spaoro

Nanana ny akony nahatonga ny filoha Frantsay handray fanapahan-kevitra hanajanona avy hatrany ny lalao ny fisiahana ny La Marseillaise hiram-pirenena Frantsay mandritra ny lalao iraisam-pirenena iray ilalaovan'ny ekipam-pirenena Frantsay amin'izay mifanandrina aminy (any amin'ny taniny).Izany dia tohin'ilay toe-javatra nitranga tao amin'ny Stade de France nihaonan'ny ekipam-pirenena Frantsay tamin'ny ekipam-pirenena Toniziana izay nozanahin'ny Frantsay taloha tamin'ny talata 14 oktobra 2008 lasa teo.

Ny tena tsy levon'ny vavonin'ny Filoha Frantsay sy ireo antoko lehibe UMP sy PS tamin'ity fisiahana ny hiram-pirenena Frantsay ity manko dia ny karazana famadihana ataon'olona mizaka ny zom-pirenena Frantsay ihany. Miharihary eo imason'ny rehetra manko fa ireo mpijery Arabo nanatrika ity lalao ity dia mizaka ny zom-pirenena Frantsay ny ankamaroany. Tena manafintohina tokoa raha ianao izay nitady ny zom-pirenena Frantsay ka nahazo izany no misiaka ny hiram-pirenena Frantsay mandritra ny fihaonana ara-panatanjahan-tena iray. Eritrereto anie ka ny Tanindrazanay Malala no anaovan'ny Malagasy toetra toy izany e!

Ny teto Madagasikara moa dia tsy nahita ity lalao ity, sy ny Champion's league ihany koa, satria toa misy tsy fifankahazoana lalina eo amin'ny CFI sy ny TVM, na eo amin'ny mpitondra Frantsay sy ny mpitondra Malagasy ihany koa saingy tsy mivandravandra loatra izany; fa na izany aza dia tonga taty ny akony noho ny vaovaon'ny TF1 alefan'ny televiziona sasantsasany eto an-toerana. Raikitra ihany koa ny adi-hevitra eo amin'ny mpinamana na mpihavana ny amin'ny mahamety na tsia ny fihetsika nataon'ny Arabo nisiaka ny hiram-pirenena Frantsay ity. Eken'ny rehetra manko fa mafana ra ny Arabo. Etsy andanin'izany, raha misy ekipa Malagasy tonga any amin'ireny tany vaventy ireny dia hotohanan'ny Malagasy monina any ireny, eny fa na dia mizaka ny zom-pirenen'io firenena io aza izy. Hafa manko ny akaikin'ny fony raha mbola teto Madagasikara ihany koa no nahalehibe azy. Hafa mihitsy indray ny sain'ny ankizy raha tsy mba nohalehibiazina teto Madagasikara izy. Fa eo amin'ilay fisiahana ny hiram-pirenena mihitsy no mampisara-kevitra ny maro.

Fa olona efa retirety kosa no nilaza, izaho tsinona tsy nahita, fa efa nosiahan'ny Malagasy ihany koa ny Hiram-pirenena Frantsay raha sambany mba nisy ekipa avy any Lafrantsa mihitsy fa tsy avy ao La Réunion nandingana ny kianjan'ny Mahamasina tamin'ny taona 80 tany ho any. Mbola nisy tavela izany ny fankahalana Frantsay nandritra io fotoana io na dia efa tanaty fahasahiranana aza ny Malagasy. Vao nanomboka hoy izy ny La Marseillaise dia nisy olona maromaro nisiotsioka ilay hiram-pirenena. Nifampijerijery, hoy izy, ireo niaina tsara izany Fanjanahantany izany. Voakapokapoka karavasy sy mety higadra mihitsy izay mbola tratra mihetsiketsika mandritra ny La Marseillaise, na izay lehilahy tsy manala satroka ihany koa. Tsy azo natao ny miresaka fa manaja tsara ilay hira ihany no zava-dehibe. Ankehitriny (tamin'io fotoana io) dia toa tsapa tokoa fa tsy voafehin'ny Frantsay hay ny Malagasy ka azo natao na dia ny nanompa ny hiram-pireneny La Marseillaise aza.

Fandalovana ihany anefa ilay vanim-potoana satria nandritra ny Lalaon'ny Frankôfônia notontosaina teto Madagasikara ka nanao ny famaranana tamin'ny basket ny Frantsay sy ny Senegaly dia naka Frantsay avokoa ny 98%n'ny mpijery Malagasy. Tsotra ny antony, Ny senegaly manko no nandresy ny Malagasy tany amin'ny dingana talohaloha tany. Izaho kosa no tao anatin'ilay 2% nanohana ny Senegaly satria fiaraha-mientana Tatsimo sy Afrikana ary samy nozanahin'ny Frantsay no tao an-dohako. Izaho izany ilay nihoraka mafy rehefa nandrombaka ny amboara ny Senegaly fa toy ny nivoaham-paty kosa ny ankamaroan'ny Malagasy. Na ireo namako niara-nijery ny lalao tamiko aza lasa nisy niavona tamiko rehefa nody, nefa aho amin'io mbola nanadrohadro ihany.

Ny tena nahavariana ahy dia ny tamin'ny lalaon'ny nosy notanterahina tamin'ny herintaona teo (Aogositra 2007). Tena tsy menatra ny manohana La Reunion mihitsy ireo vehivavy Malagasy manambady Frantsay na dia Malagasy izao aza no ifanandrinany. Tena babon'ny Frantsay tokoa, hoy aho, ny fo amam-panahiny ka tsy nanafina mihitsy ny fankamamiany Frantsay ry zareo. Dia hoy aho namarana hoe, tena hafa mihitsy ny Malagasy mizaka zom-pirenena Frantsay raha ny tahaka azy ireo. Miala tsiny aminareo vehivavy manambady vazaha aloha fa tsikaritra sy nivandravandra mihitsy io tamin'ny lalaon'ny Nosy ranomasim-be Indiana farany teo, ka tsy vitsy ny bandy no letra sy nanompa azy ireny mihitsy aza saingy safidy io ka tsy ifanerena no tena marina.

Hevitra

ary le hoe "sonegaly mahazo baiko" :)

Nampidirin'i simp @ 22:41, 2008-10-19 [Valio]

hihihi...ahoana kosa moa ireo vavy gasy nanambady lahy frantsay ho tsy hanohana frantsay e.
Normal kosa izany e.

Nampidirin'i zoreilles @ 10:40, 2008-10-20 [Valio]

Ilaina mihitsy ny mandinika ny toedraharaha misy eto antoerana fa raha ny tenako manokana dia manameloka tanteraka ny fanimbazimbana ny hirampireren'ny foko hafa, nefa koa mahatsapa ihany ny lesoka lehibe misy eto antoerana ka mahatonga toejavatra mampalahelo toy izao. Ny fiainan'ireo zanaka sy zafikelina "immigrés" dia misy tena mampitroatra tokoa. Matetika dia nafatratra any amin'ireny cités lavitry ny tanandehibe ireny izy ireo; Tsy misy fandanianandro (loisirs) fa de mirenireny andavanandro, tsy misy infrastructure fa lavitry ny gara masinina, zara fa misy fiara fitanterana, tsy misy biblioteka, tsy misy toerana filomanosana, tsy misy trano fijerena sarimihetsika, tsy misy tena tsy misy fa dezaka, miampita trotoara no hany sisa atao. Dia atao ahoana moa ny hitroatra amin'ny fiainana, raha izay no mba tontolon'andronao ? Ny RaD matetika tsy an'asa, noho izany tsy manana vola handoavana ny sarandalana ho an'ny zanany maro an'isa; dia aiza no tadiavinao halehan'ireo ankizy be dia be ireo ? Mirenireny fotsiny de mitoratoraka panneaux, bus, tranompiasampanjakana sns... ary tsy misy iray maningana fa de mifampitondra amin'ny ratsy daholo. Sarotra be ny fiainan'ireo ankizy ireo. Tsy omeko tsiny raha mitroatra izy ireo, satria tsy misy fitsinjovana ireto taranaka faramandimby avy amin'ny fanjakana frantsay. Raha tiana ho tafita ny mponina, omena musée, complexes sportifs, cinémas, bowling, activités de loisirs betsaka, de samy mandray ze azony raisina arakaraky ny fahefamividiny ny tsirairay fa raha sady tsy omena asa ireo RaD, tsy misy vola, tsy misy fandaniandro ny ankizy, dia tsy ho gaga ve ianao raha mba hipoaka ny kôkôty minitra indray andro any ? LA FRANCE ne peut accueillir toute la misère du monde, mais elle doit savoir en prendre fidèlement sa part, hoy Michel Rocard Nalaina tany amin'ny taniny ireo olona ireo. Tokony ho raisina andraikitra hatramin'ny farany ny fanafarana azy
Nampidirin'i sakaizakely @ 15:12, 2008-10-20 [Valio]

asa ny supportera malagasy any madagasikara fa tsy hitako mihitsy aloha @ fomba ahoana no hahitanao suportera baolina kitra aty Frantsa, na vozongo io na tsia, ka tsara taiza sady mahalala fomba.

izay siaka kely iny koa ve no haninona fa lalànan'ny spaoro sy ny taim-bava io !! izay tsy mahatanty mody :-)

Nampidirin'i Rajiosy @ 15:38, 2008-10-20 [Valio]

ok

Samy manana ny safidiny sy ny eritreretiny ho mety 'tokoa ka tsy ifanomezan-tsiny e :).

Nampidirin'i Tokinao @ 19:47, 2008-10-20 [Valio]

Hampiditra hevitra

Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Janoary 2018 »
Ah At Ta Ar Ak Zo As
  1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31      
Tahiry
Credits
LifeType IE7 XHTML CSS Firefox