« | »

Tsy manao fifanarahana raha tsy miverina aloha i dada !

2009-05-15 @ 21:33 in Politika

Tampoka tamin'ny olona ihany ny namindrana ny toerana ihetsiketsehana ho eny amin'ny kianjan'Ambohijatovo indray tamin'ity andron'ny zoma 15 mey 2009 ity. Vao tsy ela akory no nandavana tsy hamelana ny vahoaka mpandala ny ara-dalàna sy tia filaminana tsy handeha eny dia nahazo alalana tampoka indray ho amin'ity herinandro ity, ary misy ny manoratra any ho any hoe isaky ny Asabotsy no nahazoana izany alalana izany. Nefa hitantsika fa dia efa natomboka zoma izany fihetsiketsehana izany.

Azo tarafina fa vitsy ireo nanatrika teny Ambohijatovo tamin'ity andron'ny Zoma ity. Ny vitsy lazaiko eto dia lasa mifanahantsahana tamin'ny isan'ny olona tamin'ny Asabotsy 21 marsa 2009 nanaovan'ny mpandala ny ara-dalàna fihetsiketseha-mpanoherana voalohany indrindra (eo ho eo amin'ny 2500 ka hatramin'ny 3000 eo ho eo ny isan'ny tonga nanatrika teny). Ny maro tamin'ireo tonga teny Ambohijatovo moa dia vao ora vitsy monja no nahalalany fa nifindra teny indray ny tolona. Azo heverina ihany koa fa tsy maintsy nisy ny mbola nitonatonana teny Ankorondrano. Noho ny tsy fisian'ny fitaovam-piseraserana iray lehibe ho an'ny tolona no mahatonga izany tsy fahalalan'ny maro izany. Hita ihany ny fahabangana amin'ny tsy fananana haino aman-jery mpanentana toy ny tamin'ny fotoana nisian'ny Radio Mada. Teny indray miserana tamin'ny radio fahazavana sy indray miserana tamin'ny Matv no nahafantarana fa eny Ambohijatovo indray no fotoana ny Zoma sy ny Asabotsy. Koa raha varimbariana ny mpihaino sy ny mpanaraka tamin'ny fotoana nilazana io fotoana io dia tsy hahatandrina ilay filazna miserana naharitra 3 segondra monja.

Fa inona sy inona avy moa ny sombim-baovao nampitaina teny nialoha ny tena fotoana? Tamin'ny ankapobeny isaky ny misy ny filazana miserana teny an-tsehatra toy ireny dia tsy nino ny fahamarinany loatra aho ka izay no antony tsy hanoratako azy an-tserasera mihitsy. Hita ihany anefa fa saiky nitombina avokoa ireo vaovao an-tsefatsefany nampitaina. Efa lasa tsy nipoitra teny an-tsehatra intsony ohatra i Vola Dieudonné fa efa notadiavin'ny miaramila tany an-tranony ka rehefa tsy hitany tao dia ny zanany no noraofin-dry zalahy ho eny Ambohibao CNME. Nampitaina tamin'ny andron'ny 13 mey iny ihany koa ny fisamborana olona ahiahiana ho mitady hitarika fihetsiketsehana (TIM sy MFM) tany amin'iny faritra Amoron'i Mania iny (Ambositra). Ninia aho tsy nilaza izany, vaovao an-gazety Taratra i andron'ny Zoma io no nahitana amin'izay fa nisy tokoa ny fisamborana ary nalefan-dry zalahy aty Antananarivo ny fanadihadiana ireo olona ireo na dia manana Fitsarana Ambaratonga voalohany aza ny any Ambositra. Tsy nilaza ny fisian'ny vaovao ny gazety raha tsy noho io famindrana toerana ny olona nosamborina io.

Dia inona sy inona izany no nampitaina ny andron'ny Zoma? Ny faritra Alaotra Mangoro sy Betsiboka indray no nampita tamin'ity andro ity. Ny tany amin'ny faritr'i Betsiboka moa dia ny fitetezana mpanankarena ataona andia-miaramila miampanga izay tsidihany hatrany fa manafina vola amina gony hanohanana ny mpitolona eny Ambohijatovo na eny amin'ny Magro (Auditorium) Ankorondrano. Fomba entina misava trano hatrany io toe-javatra io na dia tsy misy aza ny fahazoan-dalana hisava ny trano ary fomba ihany koa hakana vola amin'ireo trano tsidihin-dry zalahy. Rehefa amin'ny fotoana tahaka itony moa dia tsy fantatra intsony izay mpanararaotra sy tena izy. Ny depiote tany amin'iny faritra iny no nitatitra izany vaovao izany.

Tany amin'ny faritra Alaotra Mangoro indray, efa fantatra ny nakana ny fiara vitsivitsy tao amin'ny orinasa mpanangom-bokatra Fanampy Rice. Notaterina indray fa tamin'ity andron'ny Zoma ity dia nisy miaramila nandeha tamin'ny fiara 4X4 efatra indray niverina nitodi-doha nankany amin'ity orinasa ity. Notoherin'ny zandary sy ny fokonolona ny fiavian'ireto miaramila ireto ka nampisy fifampitifirana tamin'ny miaramila sy ny zandary. Voatery nihemotra ny miaramila noho ny fifanandrinana. Ankevitry ny handoro ny orinasa ry zalahy ireto satria nitondra lasantsy tamina bidons maromaro araka ny tatitra. Ny depioten'Amparafaravola indray no nilaza ity sombim-baovao ity. Nanoratra ireo vaovao ireo aho satria nokabariana ampahibemaso ny filazana azy nefa tsy mamoaka ny vaovao milaza ny fihoaram-pahefana ataon'ny mpitandro ny filaminana intsony ny haino aman-jery ary ny gazety.

Inona ihany koa ny vaovaon'ny tolona? Araka ny hitantsika any amin'ny vohikala hafa any dia miezaka tokoa ny fiarahamonim-pirenena mampifanaraka ny hery politika misy eto Madagasikara amin'izao fotoana izao. Namoaka ny karatra mavo ry zareo izay manana ny lohateny manao hoe "Mifanaraha". Amiko manokana dia hevitra tsara io hetsika ataon-dry zareo hisian'ny fifanarahana io. Ny zavamisy anefa dia misy ny olona voasakana tsy hanatrika izay mety ho fampifanarahana ny rehetra izay ka itakian'ny mpandala ny ara-dalàna ny hamotsorana ireo nalaina an-keriny noho ny hevitra politika rehetra. Nifandrindra tamin'izany ihany koa antso nataon'ny filoha Ravalomanana avy any Afrika Atsimo. Mitsahatra ny fifanatonana sy ny fifanarahana rehetra mandra-pahatongany satria izy no hitarika ny delegasiona ho an'ny mpandala ny ara-dalàna miaraka amin'ny praiminisitra tendreny Atoa Manandafy Rakotonirina izay araka ny fahazoako azy dia efa afaka mifampiantso amin'ny mpiara-mitolona amin'izao fotoana izao. Anjaran'ny hery politika hafa rehetra noho izany ny mieritreritra izay avaly ny soso-kevitry ny mpandala ny ara-dalàna.


jentilisa, zoma 15 mey 2009 amin'ny 23:32

Hevitra

RAZILY

mino aho fa efa eo ampanoratana i Jentilisa fa ialohavako kely androany. Faly tokoa aho nahita ny sarin-dRazily "afaka", na dia hita ho reraka sy mahia kely tokoa. Mbola sary ihany aloha no hitako fa asa izay fitantarany izay nanjo azy tany izao... Manaraka izany hitako koa ny vaovao hoe nandefasan'Ingahy Kadhafi fiara-manidina manokana i tgv (!) ho any aminy ary dia efa midedaka sahady hoe porofon'ny fankatoavana azy ho filoha izany... ary farany ny hoe mampanahy ny frantsay anefa izy izao...
Dia manontany tena aho hoe inona no zavatra mitranga any ambadiky ny sehatra any mahatonga izao fivoaran-javatra mangingina izao, niantomboka t@ Ambohijatovo? Te hampiseho tarehy tsara @ eran-tany ve hoe jereo fa izahay ange tsara fanahy sy be indra fo ary mamela ireo "mpikomy" hanao izay ataony?
Etsy andanin'izany, ilay feo fahatelo mirihariha eran'ny tanàna miaraka @ mpiambina tsy miaramila mitambasy sy ny mpihira mpanafana sy mpamporisika midera ny asan'i charles mpampihorohoro ny tanàna... Efa hatreny amboalohany aho no nisaina foana hoe toa zavatra tsy azon'ny sain'olon-tsotra sainana velively ho mety hitranga daholo no mitranga eto Madagasikara izao (absurde), ary mbola mitohy mihevitra izany aho fa asa ianareo.
Izao aloha dia manontany teny aho hoe iza avy ireo nentin'i tgv hanaraka azy hanolo-tsaina azy any izao ary inona no paika holalaovin'Ingahibe milaza ho Mpanjakan'i Afrika? hanohana ny namany teo aloha izay ao ambadik'i tgv sa... ?
Dia samia ho ela velona hiara-mahita indray ary dia mirary soa ho an'ny rehetra ary mankasitraka hatrany.

Nampidirin'i gasi @ 21:21, 2009-05-16 [Valio]

...

mamaly ny tenako ihany aho fa hitako androany 18 may fa ilay antsoina hoe "Patrick Lelou, mpanolon-tsainany manokana" no niaraka amin'i tgv any Lybie... tsy asiako fanampiny.
Fa ahoana indray koa ny resabe mandeha hoe maty sa efa tsy manana ny toe-batana hampihorohoro intsony ingahy ra-charles? vao maika mampitombo ny ahiahy hoe misy raha ao ambadika ao.
Ho tafita tsy ho ela anie ny tolona!

Nampidirin'i gasi @ 12:07, 2009-05-18 [Valio]

errata corrige

azafady @ ilay "Leloup" sy Libye, diso tsipelina

Nampidirin'i gasi @ 12:09, 2009-05-18 [Valio]

nampanginina izy fa tsy maty izany. Nisy aza moa nilaza fa nioaka any ivelany any izy saingy tsy fantatro aloha ny momba izany

Nampidirin'i jentilisa @ 15:45, 2009-05-18 [Valio]

Air Force I and II

Nioraka indray mandeha izahay mivady nahita ny sarin'í Razily tao amin'ny topmada. Mety misy hetsika ambadika izao. Ho hitantsika eo ihany izay hiseho.
Ny mahalasa fanotaniana ahy dia ny Air Force I & II izay nolazaina fa hamidy avy hatrany. Efa lafo ve? sa mbola miantsona eo Ivato ihany. Hitako koa ilay resaka hoe nasaina naverina ho lokony taloha ny air force I satria hampiasain'ny HAT. Ny henoko tsidrin-tsofina dia tsy hahalafo anío (AFII) ry zalahy ao amin'ny HAT, satria ny dealer eran-tany dia efa mahalala fa toan'ny halatra ilay izy satria avy amin'ny mpanongana fanjakana. Izay no hanontaniako hoe, ahoana ny vaovao momba ireo Force I sy II ireo.
Rolls

Nampidirin'i Rolls @ 01:05, 2009-05-19 [Valio]

ra8 namono olona

vahoaka malagasy re zao novonoin dra8 tetsy ambohitsorohitra zao

Nampidirin'i manohitra ny monopolisation économique @ 16:48, 2009-05-19 [Valio]

planety samihafa

Raha mbola variana manala voly ny vahoaka ireto mpanao politika isan-karazany dia mihalavitra azy ireo hatrany ny tena fitadiavana vaha olana ho an'ny vahoaka. Nofaizin'ny hat sy ny mpomba an-dravalo ny fiainam-pirenena.
Nampidirin'i sahirana @ 21:46, 2009-05-19 [Valio]

Aoka homarhina fa tsy fahafinaretana velively tsy akory izany manao fihetsiketsehana eny Ambohijatovo na eny amin'ny Magro izany fa izay no heveriny ho adidiny ho an'ny tanindrazany

Nampidirin'i jentilisa @ 22:31, 2009-05-19 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2019 »
Ah At Ta Ar Ak Zo As
            1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30            
Tahiry
Credits
LifeType IE7 XHTML CSS Firefox