« | »

Pin's, bokotra ary insigne

2009-09-30 @ 11:14 in Andavanandro

Tany ampita andrefan'ny manodidina an'Alaotra iny ny tena, noho ny raharaham-pianakaviana, nanomboka ny zoma 25 septambra ka hatramin'ny alatsinainy 28 septambra koa aza tsiny indrindra raha heverinao ho elaela aho no tsy namaham-bolongana. Toa hafa ihany no nahazoana ny fandehan'ny raharaha tao amin'ny Firenena Mikambana (Misy lahatsoratra Global Voices teny anglisy nadikako ho teny malagasy rahateo ato) nandritra ny tontolon'ny Alakamisy sy ny Zoma tany lavitra tany.

Nanontany vaovao tamin'ny olona taty Antananarivo ny tena ny alin'ny Sabotsy, nanontany ny fandehan'ny raharaha, ary dia nitombina ny ahiahiko fa tsy hisy fivoriana vanona izany ao Mahamasina ao, fa mbola fandrika navelatra ihany iny. Natatatatako ho fanodikodinana ny sain'ny olona tsy hieritreritra izay hivory ao Ankorondrano Magro ireny toe-javatra ireny, sady izany rahateo no eritreritry ny nanatrika magro tamin'ny alakamisy nilaza ny tsy tokony ivoahana ny toerana intsony nihorakora-panoherana izany handeha toeran-kafa izany ny andro Sabotsy (Efa fisarahan-kevitra aloha izany!). Azo heverina ho nanaiky tsy sazoka fotsiny ny mpanatrika rehefa nanizingizina ny mpitarika fa efa ampelatanana ny taratasy fanekena hanaovana ilay fivoriana.

Nitantara ihany koa ilay olona nanontaniana fa henjana tokoa izao tenin'ny solontenan'i Kôngô tao amin'ny Firenena Mikambana izao nilaza ny solontena malagasy ho "sans qualité". Noheveriko fa tamin'ny alakamisy ihany no nisy tantara, hay hafa mihitsy ny tantaran'ny andro zoma ka tsy azoko ny resaka raha tsy tonga teto Antananarivo mihitsy aho. Ho tahaka ny ahoana re izany ny fahazoan'ny sarambambe Malagasy any ambanivohitra rehetra any raha izaho izay mpanaraka tsy tapaka ny vaovao aza no niala kely fotsiny dia very tanteraka?

Izay no ela fa hitodika any amin'ny lohatenin'ny lahatsoratra aho. Tohin'ilay fanentanana nataoko tamin'ny herinandroihany izy ity. Fomba iray hanehoana ampahibemaso sy an-dalambe ary any amin'ny birao sy ny toerana rehetra misy ahy ny fanoherako ny fanonganam-panjakana misy eto Madagasikara. Namakafaka hatrany izay tokony hatao ny tena hany ka nahita ity hevitra manaraka ity. Nanomboka ny talata 29-09-2009 aho dia mitondra pin's kely hatrany mipetaka amin'ny ankavian'ny akanjoko. Tsy maninona ilay pin's na maneho inona na maneho inona fa ny ao an'eritreritro raha mitondra io amin'ny toerana rehetra aho dia "manambara sy maneho amin'ny rehetra aho fa manohitra ny fanonganam- panjakana misy eto Madagasikara ary manohitra ihany koa ny herisetra amin'ny lafiny rehetra". Hevitro ahy manokana izay, koa raha resy lahatra ianao dia manaova toa ahy ihany koa. Rehefa pin's na insigne tsy voatery miresaka politika io fa mety no pin's an'ny orinasanao aza no atao amin'ny ankavian'ny akanjonao dia entinao maneho amin'ny manodidina anao io fa manohitra ny fanonganam-panjakana ianao ary miray fo amin'ireo izay mitolona isan'andro saingy mamita ny adidinao eo amin'ny fiainana an-davanandro.

Raha mbola mahamenatra anao kosa  ny fanaovana io dia tsy hitako intsony izay azo atao ho anao fa aleo mitsotra hoe efa mety amiko ny toe-draharaha amin'izao fotoana izao. Rehefa tsy manana pin's na insigne (toy ireny apetaka any ampiangonana ataon'ny sampana fitadiavam-bola ireny) dia ataovy bokotra tsotra izao zairina eo. Ampitampitao amin'ny namana sy ny mpitarika mihitsy aza izao hevitro izao fa tsy mahafantatra aloha aho hoe voarara an-dalambe ny fanaovana pin's e! Araho maso aho ary bedeso raha toa hitanao fa tsy mitondra pin's rehefa mifanena aminao.


jentilisa, 30 septambra 2009

P-S: 30 septambra 1895 : nitsangana ny saina fotsy teo Manjakamiadana. Resy ny tafika malagasy... koa hanangana ny saina fotsy ve ianao sa menatra ve ianao raha tsy mahasahy maneho ampahibemaso amin'ny fomba bitika dia bitika ny tsy fankasitrahanao ny fanonganam-panjakana?


Hevitra

:)
fa mety tsy mandaitra ra tsy asiana famaritana kely le hoe pin's kle...
ohatra hoe sainam-pirenena ve mety?

:-P

Nampidirin'i simp @ 19:11, 2009-09-30 [Valio]

Oadray! tsy maninona mihitsy ka! inona no probleme? zara aza ahafahana mamamly raha sanatria misy misambotra

Nampidirin'i jentilisa @ 19:17, 2009-09-30 [Valio]

lol
tsindrio le rohy
;-)

Nampidirin'i simp @ 19:22, 2009-09-30 [Valio]

jentilisa

efa hitako soa aman-tsara simplex a! zara aza ho'aho!

Nampidirin'i jentilisa @ 19:32, 2009-09-30 [Valio]

ah ok

zany hoe ra ny tompon-dakan'ny fanonganam-panjakana aza manao an'le izy lasa otran'ny tsisy dikany indray le izy :)
mais bon, @ maha sainam-pirenena azy anga...

Nampidirin'i simp @ 19:40, 2009-09-30 [Valio]

MIsy zavatra 3 tonga ato antsaiko :
- hevitrao manokana ilay pin's koa dia aza omena tsiny raha tsy manaraka ny hevitrao izahay !
- raha toa ary ka manao io daholo ny olona ka raha voadaroka eny ho eny dia ahoana ? efa hay ihany ny ratsy fa tsy kely làlana !
- hay nanao pin's koa ireo alika tany amin'ny fivoriana ? tsy te-hitovy amin'ny biby saina aho ! MAsina ny tanindrazana.

Nampidirin'i Kdaombaramita @ 19:47, 2009-09-30 [Valio]

Inona no fiantsoako anao an'eritreritra rehefa mamaky ny soratrao? "Le 3ème oeil".

Vous êtes un original vous. Un mec bien dans ses chaussures.
OK pour le pin's

Nampidirin'i Mmm @ 20:15, 2009-09-30 [Valio]

jentilisa

Mankasitraka amin'ny fanehoan-kevitra, andeha atao toy izao indray ny hevitro: io pin's misy ny sainam-pirenena io manko dia natao ho an'ny solontenam-pirenena amin'ny ankapobeny. Vitsy noho izany ny olona manana ny toy ireny araka ny fahalalako. Izay no tsy nametrahako azy io ho olana velively. Amin'ny fotoam-pivoriana iraisam-pirenena no fanaovany azy ireny.

Ny antsika kosa raha manao io isika amin'ny andavanandro. Raha manana maromaro ianao dia afaka miovaova pin's hatrany moa tsy voatery hividy pin's manokana ho amin'ny tolona. Marihako fa misy mivarotra pin's antsoina hoe DADA eny Ankorondrano nefa ninia aho tsy hanao dokambarotra momba io sady sao ao maika hahamenatra ilay olona ny hitondra azy an-dalambe. Fantaro ihany koa fa misy dia misy ny olona manao ny tee-shirt milaza mivantana ny safidiny. Azy izay fa ny antsika kosa fitarihana ny olona hihasahy sy hifanentana tsikelikely.

Nampidirin'i jentilisa @ 21:13, 2009-09-30 [Valio]

Olana

Ny fahitako azy dia ny olona te haneho ny heviny (pin, te shirt,..) fa saingy ny tanin-tsika mbola vao miana-mamindra @ ity atao hoe demokrasy ity. Koa matahotra ny olona sao dia voadaroka rehefa mifanena @ ireo be sandry sady tsy valaharana.

Eo no olana!!

Nampidirin'i Hope @ 02:12, 2009-10-01 [Valio]

ok

Mankasitraka ra-Jentl a!
Tsy dia fombako loatra ny mandoka olona, ary tsy tiako koa ilay dokafana :).

Fa ny blaoginao dia ahitana fa tena olona sahy mijoro ianao, ary tia Tanindrazana.

Tsy mba manao mpitari-bato vilam-bava fa tonga dia maneho ohatra avy hatrany.

Maniry tokoa aho mba hahelin'ny mpitari-tolona ity satria hevitra tsara.

Nampidirin'i Tokinao @ 18:36, 2009-10-01 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2018 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox