« | »

Isaia mpaminany milaza ny zavamisy ankehitriny

2009-12-05 @ 09:51 in Ankapobeny

Ankamantatra mampihomehy ihany aloha hanombohana indray ity resaka mahafinaritra ity. Ahoana ny fomba hampidirana olona efatra ao anaty videoconference? Valiny: Mialoha ny hanaovan'ny olona telo conférence dia manao video aloha ny iray. Ka ny fiteny mahazatra ny olona eto Dago dia hoe cinema cinema fa ny fantatry ny sarambambem-bahoaka aloha dia video no mora kokoa ny mijery aminy na dia mahatsemboka mampanara- pofona aoka izany aza ao anatiny. Olona tsy mba misaika na mandro manko matetika no tena mijery video eto amin'ny tanàna koa. Fa ny video tamin'ity indray mitoraka ity tsy naseho ny fiara sy ny diam-bala fa resahina am-bava fotsiny. Mba ahoana tokoa ary izany? Niandry ihany ny tena fa he-e-eh niandry vasoka. Misy ihany ireo nanamarika fa nandeha izany ny video resaka baomba sy fanafihana isaky ny handeha amin'izany tanàna antsoina hoe Maputo dia nivadika kely indray ho tifitra tsy henon'ny olona tany amin'ny toerana nolazaina ho nisian'ny trangan-javatra indray no tantaraina.

Fa ny mahavariana amin'ny fomba fitantarana dia ny teo anilan'ny saofera no nokendrena fa tsy ny olona tamin'ny fiara. Izany hoe, hevitro ity, tsy nisy fikendrena an'Ilaikely akory ny tifitra na dia atao hoe nisy aza io trangan-javatra io. Raha ny filoha Ravalomanana dia azo heverina tsara mihitsy ho mipetraka amin'ny seza aloha raha ao anaty fiara fa tsy mbola nahita an'Ilaikely hipetraka amin'ny seza aloha loatra aho. Mazava loatra fa nitovy tanteraka ny hevitro sy ny hevitry ny filoha Ratsiraka. Ny manahirana dia efa nahateny ny azy mialoha ny hamoahako ny hevitro tamin'ny bolongana ny filoha Ratsiraka dia manjary heviny iny, mialoha ny hevitro. Azoko heverina ihany ao anatin'izany fa mba manana fahatakarana tetipanorona tahana ny miaramila manana grady amiraly ihany hay izaho ity. Izany hoe heveriko fa paikan'izy samy ao anatin'ny ankolafy ihany io kitifitifitra na kibaombabaomba io. Aiza ka dia tonga ihany koa ny tsaho fa nisy nitifitra ihany koa ny fiaran'ingahy Jeneraly Sivily tsy menatra ny mametraka saina eo akaikiny rehefa raisim-peo sy alain'ny mpanao gazety sary izy sahala amin'ireny hoe izy indray no filoham-pirenena.


Moov : mbola mitohy ny olana

Dia hilaza aminareo ny zavatra voamariko amin'ity fiseraserana amin'ny alalan'ny moov mandoa sara mialoha ity indray aho. Saiky nisy ny fiovana kely nefa dia niverina indray ny fihisatry ny fifandraisana ny Zoma io. Ankevitry ny mandany 20 minitra hatrany aho nefa tsy mahasokatra takelaka toy ny voasakoany ao anatin'ny 10 minitra taloha. Nojereko amin'izay ny adiresy IP fa raha miovaova ny IP-n'ny mpampiasa aterineto (mpanjifa na client hoy isika) dia tsy miova fa ny laharana 192.168.1.1 hatrany kosa ny adiresy IP-n'ny server manolotra tolotra ho an'ny mpampiasa moov fandoa sara mialoha. Tsy fantatro aloha hoe mahazaka mpanjifa firy io server mety ho tokana ho an'ny manerana an'i Madagasikara io, sady tsy havanana loatra amin'ny reska sahala amin'itony aho fa mba mampahafantatra ny zavatra hitako fotsiny. Aleo ny manampahaizana no hamaly na hanazava amiko fa mba mila fanazavana mihitsy aho.

Ity fehezankevitra manaraka ity dia nasisika rehefa tsy tafiditra an-tserasera aho halina na dia niaretan-tory aza izany. Mikaonty tsara ny faharetam- potoana laniko manko aho. Teo amin'ny fikaontiana ary raha mbola tokony hanana fahefakadiny aho izany hoe eo amin'ny ora efatra latsaka fahefany indrindra no laniko ary handefa ity lahatsoratra ity aho no tapaka antenantenany ny fiseraserana an'aterineto. Miezaka aho ny hiditra fa tsy tafiditra intsony. Azo heverina izany fa ankevitry ny lany izany ny fahana izay tokony mbola hananako fahefak'adiny. Ny solosainako anefa tsy mety intsony raha ilay invite@carte.mg no kasaina hampidirana fahana. Nisy fotoana tany amin'ny cybercafé aho no nampiditra ny fahana, ary mbola nety izany tamin'izany fa izao kosa tsy nety intsony. Nanana olana aho izany ka nitady vahaolana vonjimaika. Mihevitra aho ny hamory izay manana olana rehetra amin'ny moov mba hifandray hidinika ny atao momba ny olana mahazo antsika, aelezo fa aleo mivondrona ny hery, na tena tsy tiako aza dia soratako ihany ny laharam-pindaiko azo iantsoana ahy : 261 33 11 292 52. Raha sanatria moa ka tsy voaraiko ny antsonao dia andefaso sms ihany.[Nisy nanendaka aho ka lasa any ny findaiko sy ny fakantsariko? Tsy afaka antsoina aho izany aloha.]

Fa inona no ambaran'ny lohateny?

Dia izay aho vao mitodika amin'ity natao lohateny, raha mandany fotoana kely isika (io manko no ao anatin'ny perikopa vakiana ao amin'ny fikambanan'ny mpiaramamaky ny baiboly eto Madagasikara amin'izao fotoana izao dia lasa lavitra kely ny saiko. Toa mampahatsiahy ny zavamisy eto Madagasikara amin'izao fotoana izao indrindra manko ilay ao amin'ny bokin'i Isaia mpaminany toko faha-28 raisina eo amin'ny andininy faha-14  ka hatramin'ny andininy faha-18, azo tohizana hatramin'ny andininy faha-22 fa dia afoheziko kokoa ilay izy. Mazava loatra fa misy amboariko kely ny filazako azy, nefa tsy hanimba velively ny hevitra raiketin'ny perikopa aho. Raha hamaky ny tena voalaza ao amin'ny baiboly ianareo dia tsy misy tsotra ankoatra ny mandray baiboly sy ny mamaky azy. Tsy maninona raha melohinareo ho manolana ny tenin'Andriamanitra aho fa ny anton'izany dia mba hifandraika amin'ny zavamisy eto Madagasikara ny resaka ho azon'izay tsy zatra mamaky baiboly rehetra ny tiako ampitaina:


Koa mihainoa ny tenin' YHWH ianareo ry mpivanitika mpitondra ity firenena eto Antananarivo ity.
Fa niteny ianareo hoe efa nahavita fifanarahana tamin'ny FAT, ary efa nifanaiky tamin'ny lavaka (fianjerana)
Ka hanao hoe na hisy aza ny sakoroka, dia tsy tonga aty aminay izany
Fa ampinga maharo anay ny lainga, ary fika fialanay bala ny mamorona videô [fa tsy ampiana hoe conférence]

Fa dia izao no lazain'ny Tompo YHWH
Hametraka vato ao Ziona aho, vato vita fisedrana, vato tsara,
azo atao vato fototra (fehizoro) satria vato tsara orina
Ka izay mifikitra aminy dia tsy ho voahozongozina.

Ny rariny no hataoko tady fanenjanana ary ny fahamarinana ho tsindry lentam-pahefana (ny sary hitako eto dia tahaka ny fitenintsika hoe flesy)
Ho faohin'ny [balan'ny] havandra ny lainga nataonareo hiarovan-tena ary ho lasan'ny riaka ny fika fiafenana.
Hofoanana ny fifanekenareo tamin'ny FAT
Tsy hateza ny fifanarahanareo tamin'ny lavaka fianjerana fa ho potika ianareo rehefa hifofofofo fiavy ny sakoroka

[hatreo ihany aloha]

Araka ny efa nolazaiko dia azonareo tohizana hatramin'ny andininy faha-22 io natsahatro tamin'ny andininy faha-18 io fa sao dia lazaina ho masiaka loatra aho raha manohy ny filazana azy. Azo fehezina amin'ny fomba fiteny malagasy manao hoe: "manao azy ho tratry ny aloka, kanjo tratry ny alok'akoho" io teny nomen'i Isaia mpaminany tamin'ny mpitondra firenena tsy miraharaha izay hatahoran'ny olona.


jentilisa 05 desambra 2009 amin'ny 01:46

Hevitra

NIsy nanendaka aho ka lasa any ny findaiko sy ny fakantsariko? Tsy afaka antsoina aho izany aloha.

Nampidirin'i jentilisa @ 19:54, 2009-12-05 [Valio]

...

Teo ampamakiana ny lahatsoratra aho dia niomana ny hanala azy hamaly ny resakao kanefa kina sy ankona indray mahita anao hoe voaendaka io ka dify indray ny finiavana teo. Azoko an-tsaina izay mety ho tsapanao very fitaovana sy fananana izany...Mahereza, ary Andriamanitra anie hanonitra avo zato heny ny very!
Holazaiko ihany ny tiako hamaliana ny resakao fa @ loha miondrika fa tsy mihanihany intsony. Momba ny hoe olona efatra @ videoconference, tsy mpomba an'ilaibitika aho sanatria kanefa diso hevitra koa ianao raha manao hoe olana ny fanaovana izany amina olona 4, efa lasa lavitra ny teknolojia ka (saika) tsy misy intsony izany hoe tsy azo atao izany, jereo ity rohy ity ohatra, ahafahana olona 16 mifanatrika @ fahitalavitra, mifampizara antontan-taratasy, miara-manoratra amina lahatsoratra iray sns... ankoatry ny olona aman'arivony afaka manatrika izany (www.hitcast.com). Ny vidiny fotsiny no tsy fantatro fa ataoko fa tsy ho toy ny hofana fiaramanidina manokana aloha e (fa hoe fotsiny hoe hovidiana manokana ho an'ny zaza lo sy mihantaratsy fotsiny ve?). Ilazako fotsiny io hoe tsy ny videoconference amin'ny mahaizy azy akory no tsy mety, Obama aza nampiasa ny video-message t@ fivoarian'ny filoham-pirenena goavana... fa ny toe-javatra manodidina sy ny miankina aminy no tsy hahasolo ny fihaonana mivantana @ ity resaka ity.
Manaraka izay, ilay bala tokana raha marina io, mety ho fampitandremana fotsiny, mety hidika hoe "raha makany ialahy dia hain'ialahy ny miandry an'ialahy" toy ny fanaon'ny any Eropa mandefa valopy misy bala ohatra...
Ary ny hoe jeneraly sivily manangan-tsaina eo akilany rehefa alaina sary sns, tonga @ filaza hoe "copyright" io milaza hoe tsy Camarà izy akory sao afangaron'ny mpanao gazety ary koa hoe "eto Madagasikara ihany no itrangan'ny toy izao eran-tany"...Farany, momba an'Isaia, efa hatramin'ny naha-tany ny tany no mitovy foana daholo ny mpitondra sy ny mpanjakazaka, na raha masiaka loatra io dia aleferiko hoe misy ireo mpanjakazaka mitovy foana, ary hitohy hitovy ireo satria ny zanak'olombelona tsy mety mianatra avy @ tantara ka mamerina ny hadisoana efa nataon'ny razana foana ihany na ny mpanjakazaka na ny voageja... "bug" anatin'ny olombelona io ka mila "release" vaovao mihitsy vao mety ho voavaha (tsiky kely)
Mirary soa mandrakariva, ary mankasitraka lalandava!

Nampidirin'i gasi @ 01:52, 2009-12-06 [Valio]

hatsangan'ny filoha 3 lahy teo aloha ny gouvernement.

ho gouvernement mahavita ny mission aradalana izay tadiavin-dry zareo io:
- mpiompy biby (biby olona, osy mainty)
- mpamono olona,
- mpangalatra,
- mpivarotra tanindrazana
- ary mpampiady foko

Nampidirin'i mémé @ 09:06, 2009-12-06 [Valio]

liste mbola tsy feno?

- colonel Ratsimandrava,
- colonel Rakotomalala,
- cd Rapanana,
- Gl Rakotonirainy,
- Amiral Sibon Guy,
- colonel Jean Philippe,
- Bezandry Christophe
- Ravelonanosy Marijaona René ( avocats kung-fu),
- Mampilajaona,
- Maro Raymond,
- Ramboa Adrien,
- Augustin Razakanirina,
- ireo maty teny "carnage mavoloha"
- ireo maty tany tuléar: belamoty_ankerana
- .....?

mbola tsy tapitra io raha mbola afa mihetsika aho

Nampidirin'i zaza @ 09:54, 2009-12-06 [Valio]

Alefa ho an'ny mpangalatra ve ilay sms aloha e :)

Nampidirin'i Kdaombaramita @ 11:06, 2009-12-07 [Valio]

12 décembre

tsy ho hadinoiko mandra-pahafatiko ny daty 12 décembre satria io no anniversaire-ko sady anniversairen'i Dada Ravalomanana. Mahalala namana hafa koa aho mitovy date d'anniversaire aminay. Ny vavako @ ity herinandro ity dia ny mba hifanatrehanay tava. Ka na misy aza ny mivavaka mafy ny tsy hiverenan'i Dada eto M/kara intsony, izaho kosa hivavaka mafy mba hiverenany haingana dia ho hita eo izay henoin'A/tra e! Minoa fotsiny ihany.

Nampidirin'i noro @ 09:32, 2009-12-08 [Valio]

NY FETINAREO

Miarahaba anareo hahatratra ny fetinareo ary ho tahian'Jesoa Tompo hatrany afa-tsy ilay ray tsy sahy manonona io anarana io. Ny fifanatrehanareo tava tsy misy olana, fa ao koa ny sary azo banjinina sy atao ambany ondan.Ny finoanoam-poana mahavery ary mahajamba, fa tsy io lilay Mesia andrasantika atsy ho atsy. Miovà ary mahasahia mino amin'anaran'i Jesoa Kristy, fa tsy amin'ny anaran'ny mitady hanamarika.

Nampidirin'i RAFITO @ 12:26, 2009-12-09 [Valio]

ISAIA

Tsy kilalao ny ananran'Andriamanitra, ka hosoloin'ise FAT, na MAP, na BOKY MENA, na GEMA. Tsara ny mahafantatra ny tantara (Baiboly, tantaran'i Madagasikara. Ny tsy fahalalana izany, izay niniana natao (tsy voadinika firy akory ao anaty fandaharam-pianarana), ny tsy fanadihadiana ny riba malagasy, no fototr'izao "sakoroka"izao. Tsy fanahy malagasy no iainantsika fa fanahy inianan'ny hafa.Ny Afrikana no saiky manana izao sarin-toetrantsika izao kanefa efa miezaka ny hiala main'izany ary ry zareo. Isika no "kaondrana"ka tafaroboka ao anaty fotaky ny tsy fahendrena.
Ny Baiboly natao ho fitondram-panahy sy fiainana fa tsy natao ho fanoloana anarana toy ny ataon'ise. Aza miezaka mitady hanamarina ny ratsy fanahy fa efa tombontsoa nomen'Andriamanitra azy ireo mialoha loatra izany. Ny aty afara tsy hisy intsony.

Nampidirin'i RAVALO @ 12:46, 2009-12-09 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Oktobra 2019 »
Ah At Ta Ar Ak Zo As
    1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31    
Tahiry
Credits
LifeType IE7 XHTML CSS Firefox