« | »

Tononkira taombaovao

2010-01-01 @ 22:15 in Andavanandro

Endrey! Nahatratra ny taona vaovao, hono, isika rey olona a! taona vaovao hifampirariana soa eo amin'ny fianakaviana sy ny havana aman-tsakaiza ary ny mpiara-belona rehetra. Fomba fanao ve ka dia arahina? Mba andro manokana kosa e! Impiry hifampirary soa amin'ny hafa kosa ary moa? Dia inona ilay soa ifampirariana ary? Samy manana ny tiany io. Ny tena miverimberina moa amin'ny fotoana tahaka itony dia ny prospérité, santé, bonheur (fanahy iniako ny manao azy ho teny frantsay satria teny hainareo tsara izany ary azoko matetika rahateo)... Sahiran-kevitra mandrakariva aho rehefa mahazo hafatra toy ireo, nefa tsy efa tsara kosa ve ireo firariantsoa ireo? Ka samy manana izay tiany mihitsy io.

Sahirana aho, amin'ny maha-Malagasy ahy amin'izao fotoana izao, raha prospère satria hoy ihany ny teny malagasy hoe ny hazo avo halan-drivotra, dia velona ny fialonana miainga amin'ny hoe matoa manankohariana dia noho ny halatra sy ny fitsetsefana mbamin'ny fanambakana ary ny kolikoly izay nataony... Tsy mahagaga raha maro ny Malagasy any ambany ravinahitra any na dia manambola betsaka aza no tsy misehoseho loatra amin'izany, fandrao voatondro ho mpirehareha amin'izany toerana izany ihany koa. Amin'izao fotoana izao aza moa ny kely ananana mbola lazain-dry zalahy hoe aleo indray mba ho anay fa efa ela itony no anareo!

Sahirana aho, raha ilazana hoe santé satria toa manambara ahy ho tsy salama lalandava izany ka toy ny hoe farofy, nefa ny fahasalamana no voalohan-karena; ary efa tsy andrianina intsony ny marary fa ny aza tratrany ihany (aleo farafaharatsiny tendany? koa raha kenda amin'izany?). Ny fiarahabana Andriana teto Imerina no hoe  Tsarava... Tsy haiko intsony na niainga avy amin'ny teny hoe "Tsara va?", nefa mety ho firariana sahady mba ho tsara avy hatrany fa hosahirankevitra eo raha mandre hoe tsy dia salama... lanjalanjaina lalandava eny tokoa ve fa tsy mba mandeha tongotra loatra tsy ho farofy ihany e? Sa tsy mahazo manoratra tahaka izany moa aho?

Sahirana aho rehefa irariana ny bonheur satria toa petrakevitra tsy mety ho takatra (fa vano indray sa tararaka? tsy maninona ataovy vorompotsy hiara-dia, na vorondreo tsy mifanary, fa raha voromanga dia mahalala havana!), toa mametraka ahy avy hatrany ho dans le malheur... Tsy fahatsapana velively anefa izany bonheur izany ka entina ifaliana fa mitombina tsara ny hoe mijaly aho nefa sambatra. Aza tadiavina ela loatra ny hevitr'izany sao mahalasa adala anao eo... Fa torolalana kely ho anao fotsiny ilay filazana hoe: "Sambatra ny noana sy mangetaheta ny fahamarinana fa izy no hovokisana". Noana sy mangetaheta va ka ho sambatra? Minoa fotsiny ihany! Koa nahoana aho no mbola irariana bonheur nefa efa ao anatin'ilay bonheur? Dans le sens que ce bonheur me dirige vers le bonheur! Azafady! Salama tsara aho ka! mety mbola tsy ho takatrao fotsiny ny heviny!

Dia aza atao mahagaga anao nandefasako firariantsoa raha soratra manao hoe: "Ho aminareo (mandrakariva) anie ny fahasoavan'ny Tompo!" no vakianao. Satria samy manana ny Tompony io. Ao ny manana azy ho YHWH, na Jesoa, na Allah, na Bouddah, na Krishna, na Mammon... eny mety ho Moi na izaho ihany koa, tsy adino Ra-jeanne... tsia Razana no tokony ho fanoratra azy. Koa raha manonona anao hoe Tompo aho tsy ny Tompoko tsy akory no irariako hanasoa anao fa ny Tomponao ihany, mety ho miresaka tompo roa samihafa isika nefa mety miresaka tompo iray ihany koa. Fa tsy ny taona vaovao mihitsy kosa aloha no hitondra soa sy fanambinana ho anao na izany aza! Manahirana mihitsy ange ry zalahy ity teny malagasy ity nefa dia izany no malaza amin'ny olona... Toa tsianjery maimbo fotsiny.

Dia izay no ela fa dia inona loatra no nahatonga ny lohateny? Mijery ny zavamisy eto Madagasikara amin'izao fotoana izao manko ny tena ka dia mahatsiaro ilay hiran'i Mahaleo mitondra ny lohateny hoe Bemolanga iny. Toa hira taombaovao izy iny raha jerena amin'ny tonony. Dia indro averina kely ho antsika rehetra ny sombiny:

Ny taona ity miherina,
Asa izay mba entin'iny
Ahiako mbola hiverina
toy ny tamin'ny taona lasa ny zavatra raiketin'iny

Fa ny fanantenana
Efa mihena, mitsilopy
Fa tsy misy fihatsarana
Na mba hisy fiovana f'efa zary nofinofy

...   ...   ...   ...

Rahoviana no hitranga
Asa angamba atsy ho atsy
No ho tonga i Bemolanga
Dia isika tsy ho lany vatsy

Mahavariana fa be tokoa ny mieritreritra ankehitriny fa ahiana ho toy ny tamin'ny taona 2009 lasa ihany no haverina horaiketin'ity taona vaovao 2010 ity. Na dia mitantara ny trangam-piainana tanatin'ny revolisiona sosialista tsy azo niresahana politika na nitsikerana fitondrana aza izany fotoana izany, itony hira Bemolanga fampanantenana natao tamin'ny olona itony no hiram-panoherana nasehon'ny olona ny tsy fahafaliany ka nohirain'ny tanora isan-tamboho. Mandraka ankehitriny, toy ny hiram-paminaniana indray fa toa hitohy amin'ny 2010 ny tolona natomboka tamin'ny 2009. Ankehitriny, rehefa hotrandrahina tokoa i Bemolanga hay ny orinasa vahiny ihany no hitavana azy fa tsy manambola hitrandrahana ny hareny i Madagasikara. Tahaka ny hoe naniry loza ho an'i Madagasikara ihany isika hitrandraka an'i Tsimiroro sy i Bemolanga fa ny angovo dia imatimatesan'ny firenena ambonin'ny tany, ary izay firenena trandrahin'ny vahiny ny angovo ao aminy toa miady an-trano avokoa... Ka ampiadiany izay manaiky miady tsy hanelingelina ny fitrandrahany azy, fa sombintsombiny ihany ny vola omeny ny mpitondra ho fanapena-maso ity farany. Koa tsy an-dalan'ny ho any koa ve izany isika? Indrisy manko...

Manahy aho fa tsy hisy hiova
Ny omaly tsy hiova volo (Aiza kosa? tsy maintsy hoe ihany orange ve?)
Toy ny fanaka eny an-dRova
Tsisy nanombinana fa efa may avokoa (na efa zary bobongolo)


jentilisa, 02 janoary 2010, amin'ny 00:20 maraina

Hevitra

tratry ny taona e!

mmhhh, (kohaka kely)... ary sambatsambatra ve Razoky nanoratra io sa izaho no mbola jambenan'ny afomanga, ha, ha, ha!!! Arahabaina aloha tafita tamin'iny 2009 sarotra iny ary irariana mba ho moramora kokoa ny hahatafitàna ny 2010 e! izay no hitako hifampirariantsoa @izao vanim-potoana izao, (fa ny firarian-tsoa @ ankapobeny fanao isan'andro, isan'ora, isaky izay azo anaovana azy), ary raha tsy diso aho dia izay koa no tena firarian-tsoa malagasy "tratry ny taona ary dia samy ho tratry ny ho avy indray" fa zary adino fa efa saron'ny fanjanahana sy ny glaobalizasiona loatra!(prosperité,... aho hoe!) Ny hoe tratrany aloha dia mila enti-mody iray manontolo ny famakafakana azy io, fa aleo fehezina fotsiny amin'ny hoe hisaorana an'Andriananahary noho ny vita hatrizay sy izay vaovao omeny indray...
Dia misaotra anao "misy" Jentilisa, trara antitra ary mifanantera amin'ny zanaka aman-jafy (firy tokoa moa izao, hi, hi!)
Dia mamihina anao am-pitiava-namana lehibe! Ho 2010 feno fahasoavana sy fitahiana, ary hahazoana izay rehetra iriana, amin'ny anaran'Ilay nankalazaina t@ Noely anie ity.

Nampidirin'i gasi @ 10:22, 2010-01-02 [Valio]

Firariantsoa

Misaotra anao amin'ny soratra rehetra nataonao ,makatelina sy mankasitraka ary manatena ny ahitantsika ny Fandriampahalemana sy ny fivoarana ary ny fandrosoan'ity tanintsika ity!

Nampidirin'i Mandimbisoa @ 13:01, 2010-01-02 [Valio]

Lasa mihomehy indray aho! tsy sambatrambatra mihitsy aho ka! izaho anie tsy misotro toaka e! fa mitady ilay somary ihomehezana voalohany taona mihitsy aho dia io no vita

Nampidirin'i jentilisa @ 13:08, 2010-01-02 [Valio]

ok

Tratry ny taona ô.

Tohizako ny fandinihina vinaninany : zah koa mba mieritreritra toa anao rehefa mahazo firariantsoa tahaka ireo. Raha misy mirary ahy ho sambatra dia hoy aho hoe : tsy sambatra angah aho taloha, sns hihihi

Ka ny vahaolana sy hitako ho metimety kokoa rehefa mirary soa olona dia ny hoe :
- ho salama hatrany anie (raha tsy marary ilay olona mazava ho azy)
- hahay hionona (satria amiko dia io no fahasambarana)
- ho ambinina amin`izay hatao hatrany

sns

Izany hoe asiana hoe "hatrany".

Nampamdefa eritreritra ahy koa ilay hoe "tratry ny taona" sa "nahatratra ny taona". Ka ity zaraiko ity ny fomba fijeriko kely :
- raha araka ny tokony ho izy dia "arabaina fa nahatratra ny taona" tokoa no fiteny. Satria ny taona no mandeha hatrany, sy tsy mijanona fa isika no manao izay hahatratrarana ny taona iray.
- na izany aza anefa dia toa vitsy ny olona henoko miteny an`io. Koa raha ny eritreriro dia tokony handefitra ny làlana fitsipi-pitenenana, indrindra rehefa miteny. Toy ny fandeferany amin`ny lafiny maro tahaka ny :
* arabaina sy arahabaina
* manaona sy manao ahoana
sns

Mazotoa daholo e. Tsy milaza akory aho hoe kamolahy i jentilisa a hihihihi

Nampidirin'i Tokinao @ 15:55, 2010-01-02 [Valio]

NY TAONA ITY MIHERINA

"Tsy misy afaka manompo Tompo roa
Dia Andriamanitra sy ny vola
Tsy misy afaka manompo Tompo roa
Dia Andriamanitra sy ny harena..."

Faly miarahaba ny mpanoratra tratry ny taona vaovao 2010. Isaorana lehibe ianao tamin'ny lahatsoratra rehetra novokarinao teto.

ASA IZAY MBA HO ENTIN-DRY (ry taona 2010?)

Dia samia mahery sy mirongo finoana daholo isika rehetra!

Nampidirin'i HoAiza @ 03:59, 2010-01-03 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2018 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox