« | »

Miitatra eny amin ny fokontany ny fihoaram-pahefana

2010-03-14 @ 22:56 in Andavanandro

Tsy ny tsy mety izay ataon'ireo efa fandrentsika miteronterona eny amin'ny toerana avo no tiako tantaraina vetivety fa ireo eny amin'ny fototra kosa indray, izany hoe eny amin'ny fokontany sady eto an-drenivohitra mihitsy. Manjaka dia manjaka moa ny halatra tariby Jirama sy izay an'ny telma ka vaventiventy ankoatra izay mety ho halatra sy vakitrano isan-karazany any. Nisy aza moa fotoana fa nandrenesana poa-basy hatrany taty 67ha isan'alina ka nahatonga ny baiko hipetraka fa tsy maintsy mikatona ny Bar manomboka amin'ny sivy ora alina. Eo amin'ny halatra tariby moa efa nisy ny may teny ampangalarana tariby teny Soavina Atsimondrano teny. Dia avy ny sasany ka nanararaotra amin'ny lafiny fitiavana te-hahazo vola maika isam-bolana angaha.


Izaho dia miaina amin'ny fokontany iray amin'ny cité des 67ha. Ao anatin'ny fokontany iray dia misy quartiers maromaro na secteurs moa no filaza azy fahiny. Raha misy ny chef fokontany dia misy ihany koa ny chef quartier izay efa nofidiana taona maromaro lasa izay. Raha nisolo ny filohan'ny fokontany, tsy nosoloina kosa ny filohan'ny quartier. Taloha tany, rehefa be tamin'ny toerana fanariam-pako no nesorina fa navangongo tamina fanariam-pako somary lehibebe kokoa ny fako, dia nisy ny fifanarahana fa misy olona hanangona ny fako isan-tokantrano. Roanjato ariary ny fifanarahana voalohany fa efa dimanjato ariary izy amin'izao fotoana izao. Mitondra ny fako amin'ny boroety moa ireo olona azo atao hoe karamain'ny fokontany ireo. Dia misy ihany koa ny vola alaina hanadiovana ny tatatra isaky ny voalohan'ny taona, tsy dia lafo loatra ihany koa iny satria isan-taona ka tsy nampaninona ahy loatra fa ity tantaraiko manaraka ity no tsy aritro.


Indray mandeha, hono, tamin'ny faramparan'ny volana febroary 2010 iny... tena ataoko hono satria tsy nahare ny fisiany mihitsy aho... nisy fiantsoana fivoriana tampoka teto amin'ny quartier (singa ao anatin'ny fokontany fa tsy ny fokontany iray manontolo no lazaiko eto), tsy nisy na iray aza nanontaniako nahatadidy io fotoam-pivoriana io, eny fa na dia ireo nikarakara ilay fivoriana aza. Izao no natao: "Fivoriana izao dieny izao, ao amin'ny Tanimalalaka". Toerana efa fantatry ny rehetra izany fa ity no mahavariana. Tsy misy andraso andraso ilay fivoriana fa eo noho eo... tsy mifanaraka amin'ny hamehana anefa ny zavatra notapahina fa tetika hangalana na hitangosana vola ny tsirairay.


Resaka fandriampahalemana no anton'ny fivoriana. Nampanantsoin'ny tany ambonimboniny tany (atitany io) hoe ny filohan'ny quartier fa malaza dia malaza hoe izao halatra tariby Jirama eto 67ha izao ka nahazo fampitandremana ny fokontany, tokony hametraka na hanaitra ny olona hiambina isan'alina hoe. Izany hoe amin'ny atoandro miasa, amin'ny alina miambina, tsy misy ny fotoana atoriana ho an'ny lehilahy! Mazava loatra fa tsy misy ny hahavita izany ankoatra ny olona tanora na tsy misy atao loatra. Nilaza avy hatrany ny mpiteny fa efa misy tanora 26 vonona hanao izany fiambenana izany fa mba karakaraina kosa ry zareo; karazandrazany hoe karamaina izany. Natao avy hatrany ny tsanga-tanana raha manaiky ny handoa vola 3000ar isaky ny logement ny olona, ary dia zalahy vonona no nananga-tanana voalohany, miampy ny anabavy na sipan-dry zalahy, sy zaza tsy ampy taona maromaro teo, hoy ny afa-nanatrika. Raha nisy ny olona niteny fa tsy mety izany manapa-kevitra tampotampoka izany noho ny havitsian'ny olona tonga nefa idirana resa-bola dia kianina avy hatrany hoe ianao irery no tsy manaiky... izany hoe didin'ny tsy ampy taona sahady no iheverana azy nefa raharaha politika "visa A" no atao (polis=tanàna). Toy ny mpanoha-riana sy heverina ho fahavalom-bahoaka izany ireo izay mitady hiteny na hitsikera. Dia tapaka avy hatrany fa handoa 3000ar isam-bolana koa manomboka izao ny isaky ny logement.


Fa ity no mahatsikaiky : Efa fivoriana tampotampoka tsy nisy fampandrenesana mialoha izy ity, tsy nisy peta-drindrina tsy nisy megaphone ka kiririoka sy hoe mivory izao dieny izao no natao. Faharoa, tao anaty ora fiasan'ny mpiasa satria andavanandro no nanaovana ilay fivoriana, nokendrena mihitsy mba ho vitsy ny nanatrika fa ry zareo ihany no vavolombelona fa niarahan'ny besinimaro ny fanapahan-kevitra handoavana vola 3000ar isam-bolana. Fahatelo, ny fijerijerena ny taribin'ny Jirama ihany no asan-dry zalahy fa tsy misahana resaka halatra hafa izy... noho izany, tsy andraikitr'izy ireo raha misy ny vakitrano. Manaraka izany, tsy hisambotra ny mpangalatra izy ireo raha mahita fa ny mitsoka kiririoka ihany no ataony dia ny fokonolona no mandray adidy mifoha hisambotra ilay na ireo mpangalatra. Faramparany , angamba hatao mpiasa raikitra mihitsy izy ireo satria hoe handoavana fiantohana ihany koa ry zalahy. Ny tena nahasorena ny tena moa dia ry zalahy mieboebo amin'ny akanjo laoranjy avokoa, miseho ho tompontanàna irery, rehefa nitaky ny fandoa isam-bolana voalohany. Fanomezana asa ny TGV eto amin'ny tanàna izany izy ity nefa ny fokonolona iray manontolo no terena handoa ny karamany. Ahiako tsy hisy velively anefa ny tatitra ara-bola amin'izy ity.


Ny teto amin'ny quartier misy anay aza moa azoazo ihany izany tantaraiko izany ao anatin'izao tsy fanarahan-dalàna manjaka izao fa misy ny fokontany toy ny eny Andavamamba, misy olona mitaky vola 5000ar tampoka any an-tranonao satria tsy tonga nivory ianao. Ary natetitetika ilay fitakiana, ilay olona niresaka anefa tsy mahalala ny fisian'ilay fivoriana mihitsy na dia tsy niala teo amin'ny fokontany mihitsy aza noho ny hasembanana mahazo azy. Ny eto amin'ny misy ahy no fantatro koa asa re hanao ahoana ny any an-kafa any?



Jentilisa, alatsinainy 15 mars 2010 amin'ny 00:55 maraina



Hevitra

Sao dia mba hatsikana ity tantara ity ry Jentilisa?

Sao dia mba fampihomehezana en ligne ity zavatra tantarainao ity ry Jentilisa?
Atao inona mpiandry poteau? asa vao² indray izany ny mpiandry poteau professionnel?
F'angaha tsy miy polisy na zandary ny tanàna no olon-tsotra no tsy maintsy hiambina ny poteau-n'ny JIRAMA sy TELMA? koa maninona no tsy ireo orinasa roa ireo no miantoka ny fiambenana ny fananany?

Nampidirin'i Alidera A.R. @ 12:34, 2010-03-15 [Valio]

Miala tsiny aho raha mamaly hoe tsy sangisangy velively io na vazivazy fa zava-misy iainana ka izay no itantarana azy. Hovakiana rahatrizay hoe nisy fotoana tsy azo inoana ny zava-nisy tao aminy. Tsy nangataka mivantana ny jirama aloha hoe ambeno ny poteau an

Nampidirin'i jentilisa @ 18:00, 2010-03-15 [Valio]

Zanak'i dada

Salama daholo, tena miray hevitra amin'ny mpitantara ny tenako amin'ilay oe tokony hasiana mpiandry angamba ny poteaux, efa mahavariana mihintsy angé eh, sady mahamenatra. ny tenako moa dia mipetraka ety @ 67 Ha N-O raha teo, ka dia mahalala tsara ny zava-misy, fa tsy fampihomehezana mihitsy io zavatra tantarainy ao io. isak'alina izao ety aminay dia misy miantso vonjeo, vonjeo foana, avy eo misy poa-basy, ny tena anefa tsy sahy mivoaka fa dia miandry zay higadonany eo fotsiny. ny hidi-trano fotsiny no hatao mafy, dia manao anti-vol(hasinana daholo ny varavarana rehetra) fanampin'izany, dia mba mitana izay fiadiana kely zay voatsirambin'ny tanana eo eh, izay sisa no azo hatao mba hiatrehana ny dahalo, ra ohatra ka....... fa apetraka eo am-pelatanan'Andriamanitra foana ny zavatra rehetra.
Nampidirin'i Zanak'i Dada @ 05:46, 2010-03-16 [Valio]

mahalasa saina...

Dia poteau firy isan'olona no ambenana amin'izany?
Dia asa ara-dalàna voalaza any amin'ny "fitondrana" ary handoavana vola any amin'ny cnaps ve sa mbola any amin'ny domaine-n'ny informel ihany?

Dia ny atao any anaty CV izany dia hoe Gardien de poteaux électriques et téléphoniques ve?

Rafran6 tiry bao moa tsy eny @ 6 7 eny koa no mivovo? dia aiza lery sy ny atidohabeny amin'izao fa izao lery no tena tokony hiteny fa tsy hoe satria Club M ny anaran'ny séléction malagasy dia tsy mamely. Fa toa efa Barea ihany izy izao fa toa mbola vao mainka aza mangeroka.

Nampidirin'i Alidera A.R. @ 09:52, 2010-03-16 [Valio]

jentilisa

Zanak'i dada> tsy nitenyaho hoe lazao ny fokontany misy antsika. Fa hitako mihitsy io alarme ao aminareo io raha marina ny tsatoko hoe iza ianareo! lol

Nampidirin'i jentilisa @ 10:22, 2010-03-16 [Valio]

jentilisa

Alidera> efa tsy aty intsony i Francis turbo no mipetraka fa efa any atsimon'Antananarivo any. Izahay sy i zanak'i dada io araka ny tsatoko izao dia iray fokontany fa samihafa quartier

Nampidirin'i jentilisa @ 10:23, 2010-03-16 [Valio]

Ka le mpandroba a@ alina manana basy ange ka ireo zandary sy miaramila ireo ihany e.Ireo no tokony hiaro ny fanan'ny olona , nefa ry zareo no mandroba.
Izaho aloha gaga mihitsy @ tsy mpahataonga saina ny vahoaka hihetsika toa ireny 2002 ireny e, fa dia miharitra ao foana.Tsy azoko mihitsy ny fandehan'ilay izy indraindray. Sa ve dia tratran'ny oidin'i tgv voan'ny fandraikirekena marina ilay antananarivo.Misy zavatra tsy lozika amiko mihitsy ny zava-mitsanga.
Ny heno lava dia hoe matahotra miaramila mitana basy, kanefa raha ny fandeha'ny tolona t@ 19752_1991-2002, dia arakaraky ny fampiasan'ny miaramila basy vao mùaika rombotra ny vahoka, ka mitombo sy henjana ny manifestation.Ity indray mitoraka ity , dia katetaka daholo ilay olona, sa efa niova ny génération.Tsy azoko mihitsy ny fandehan'ity marina.Nitetateta nanao manifestatioon nanaraka ny tgv ny maro t@ antananarivo ary hita tena betsaka tokoa.Tsy fantatr'izy ireo fa tena suicide ber ireny zavatra ireny, efa nanarina fona, fa grave io raha mila eo RA8, fa dia mbola nanao be marenina niseo milay ihany, dia izao no niafaranay, tsy ho mandatsa fa mba fampieritreretana n y vahokan'antananrivo ihany izy ity.
Ny heno lava koa amntsy dia lazaina fa ny tanora no nifidy an'i tgv, nefa efa ho 60% no tsy nifidy ary ray aman-dreny no betsaka t@ ireo, ka tompon'andrikitra an'irao zavatra izao koa ireo ray ray aman-dreny ireo fa tsy hakifika fotsiny any @ tanora fotsiny @ izao.
Efa nananatrana mafy , ary nanao teny henjana mihitsy aza Ra8 sy ny ekipany talohan'ny fifidinana maire, fa dia mbola be mokondoha ihany ity vahoka.Fay tsara izao @ zava-misy mahazo ny firenena izao.Ny mapmalahelo ahy fotsiny dia ireo tsy nifidy an'io vendrana io no voa koa.

Nampidirin'i lucide @ 15:32, 2010-03-16 [Valio]

manao ahoana tompoko

hanandrana hiteny gasy fa mety ifangaro teny frantsay ihany na izany aza !

faly aho nahita ity bolongana ity (c'est ici que j'ai découvert que ça se dit comme ça en malgache), izay noresahan'i citoyenne t@ lahatra (?) nampidiriny farany...

ianao angamba izany mba afaka hiresaka ny momba ny fokonolona, inona no azo atao mba hiverenan'ny fomba taloha mikasika ny teny ierana. azo haverina ve sa tsia ? ary raha haverina dia inona no hanatsarana azy...

misaotra mialoha...

Nampidirin'i prettyzoely @ 21:42, 2010-03-20 [Valio]

Misaotra anao! tsy maniona anie na atao teny frantsay aza rehefa manahirana. Ny resaka fokonolona tokoa mety mbola hisy ny fotoana iresahana ny aminy

Nampidirin'i jentilisa @ 23:33, 2010-03-20 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2018 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox