« | »

Porofo an-tsarin'ny halatra

2010-07-06 @ 23:04 in Politika

Gaga ihany ny tena raha nandre ny siosion-dresaka hoe toa misy fitadiavam-pifanarahana hoe eo amin'ny Foibe FJKM sy ny fitondrana FAT amin'izao fotoana izao. Izaho moa na dia tsy nanoratra mivantana aza dia efa nanambara fa diso paika ny mpitarika tao amin'ny HMF tamin'iny 20 mey 2010 iny. Andro izay nisian'ny fifampitifirana teo amin'ny FIGN sy ny Emmoreg. Tsy tokony ho niditra mivantana tao anatin'ny raharaha ireo mpitarika ireo fa "mody" nanohy ihany ny fotoana efa nolazaina ho eny Ambohimanandray Ambohimanarina (miala tsiny amin'ilay fomba fitenenana fa ilaina mandrakariva ny ho mailo). Ny olona efa tonga teny amin'ny Mausolée ihany! Azo lazaina fa tokony ho vita aloha ny adidiny teo. Na teo aza izany fahadisoana paika izany dia tsy ankasitrahako mihitsy izany fitadiavam-pifanarahana izany. Amiko raha mifanaraka amin'ny "ratsy" dia lasa miray tsikombakomba aminy koa. Ho fahadisoana paika fanindroany indray raha izany fifanarahana izany no tontosa. 

Voatery miafina ireo mpitondra fivavahana ireo, ekeko izany fa tsy natao hahakivy ny toe-javatra. Lasa manome rariny ireo milaza tena ho mpitondra ireo raha vao misy fifanarahana eo, sady tsy hitana ny teniny na oviana na oviana ry zareo fa ny hanome famaizana izay henjana indrindra aza ny kasainy raha vao mitolo-batana eo ireo mpitondra fivavahana ireo. Tsy izany ihany fa mbola ho avy indray ny daroka sy ny fanizambazimbana ary ny fanitsakitsahana ny zo mahaolona sy ny hasina maha-mpitondra fivavahana azy ireo eo imason'ny mpanaraka azy raha vao misy fibabohana eo anatrehan'ny mpitondra ny tany eo. Ary dia ho avy koa ny fieboeboana fa ry zareo no tena irak'Andriamanitra na tendrin'Andriamanitra hitondra ka tsy hisy intsony ny hahatohitra azy ireo. Ho lasa henatra ho an'ny fiangonana ihany koa izany raha amin'ny fomba fijeriko manokana.

Hevitra niposaka avy hatrany ireo na dia tsy izay loatra aza no votoaty kasaiko etoana. Misy ifandraisany ihany manko fa resaka FJKM sy fitondrana indrindra no resahina. Eo amin'ny sehatry ny fampianarana no iompanan'ny resaka eto. Fantatsika fa eo amin'ny sekolim-piangonana dia matanjaka dia matanjaka tokoa ny EKAR, malaza amin'ny fahatsaran'ny fampianarana ry zareo ka dia mifandanja amin'izany ihany koa ny saram-pianarana. Mazava loatra raha voaloa ara-dalàna ny karaman'ny mpampianatra any amin-dry zareo. Ny any amin'ny sekoly protestanta kosa tsy dia tahaka izany loatra fa ireo ankizy avy any ambanivohitra no tena mandalim-pianarana any amin-dry zareo. Matetika anefa ireny olona avy any ambanivohitra ireny no tsy maharaka loatra amin'ny saram-pianarana hany koa voatery somary ahena ny saram-pianarana. Vokany na lasa kely karama ny mpampianatra na tsy voaloa ny karama, antsirambina avy eo ny fampianarana na lasa mikarama any ivelany ihany koa ireo mpampianatra any amin'ny sekoly protestanta. Ankoatra ny zavamisy izany dia maivan-danja ny sekoly protestanta raha oharina amin'ny sekoly katolika.

Hitan'ny filoha teo aloha Marc Ravalomanana izany toe-javatra izany, ny tenany mba nanan-katao ihany. Te-hampisondrotra ny satan'ny sekoly protestanta izy, ary ny sekoly FJKM indrindra indrindra. Na ahoana manko mety ho filaza na ahoana dia ny tenany no saiky ho mpanohana voalohany ny fanatsarana ny sekoly FJKM manerana an'i Madagasikara. Ny fananganana ny Lycée FJKM tamin'ny tanandehibe no napetraka voalohany, ary niainga tamin'ny fananganana foto-drafitrasa izany. Ny ankamaroan' ireo Lycée FJKM vaovao naorina ireo dia saiky nanakaiky fiangonana FJKM iray tamin'ny ankapobeny. Tanàna roa nananganana izany Lycée FJKM izany no hasehoko anareo, ary dia mariho sy jereo tsara ny endrik'ireo maritrano ireo. Tany Antsirabe sy tany Mahajanga ireo sary ireo no nalaiko ary tany amin'ny taona 2008 tany avokoa ny nakako azy. Soa aloha fa naka ireo sary ireo ho vavolombelon'ny tantara.
 
 

Ny sary roa dia tany Vatofotsy fa ny anaran'ny fiangonana dia hoe Katedhraly Mahafaly Fahazavana (izaho no manao "tsipelina diso" eto nefa izao no maharesy lahatra ahy) izay miorina ao Antsirabe avaratra, izany hoe ety am-pidirana ny tanàna raha avy aty an-drenivohitra Antananarivo. Na ny fiangonana aza dia ao haingana no niorina noho ny fahavitsian'ny fiangonana raha mitaha amin'ny isan'ny mpino FJKM. Ny trano sekoly eto dia eo ampananganana ny andrintrano izay vy miloko manga raha tazanintsika tsara.
 
 

Ny sary iray kosa dia ny sekoly FJKM izay naorina akaikin'ny FJKM Ziona Vaovao Mahajanga. Eto dia hitantsika miharihary fa raha amin'ny sakan'ny trano dia 6 ny isan'ny andry vy, 17 kosa ny isan'izany andry vy izany raha manaraka ny lavan'ny trano ary 3 ny isan'ny rihana. Tsara homarihina manko izany toe-javatra rehetra izany fa raha mitovy ny maritranon'ny Lycéé FJKM Antsirabe sy Mahajanga dia azo heverina avy hatrany fa ho tahaka izany avokoa ny maritranon'ny Lycée FJKM rehetra manerana an'i Madagasikara. Ny tafon'ny trano moa raha jerentsika dia tsy tena marindrano fa somary mitady ho boribory izay ihany. Marihiko hatreto fa ireo tanàna roa ireo ihany no voatsidiko ka azoko sary tamin'ny taona 2008, nefa azoko antoka fa mitovy avokoa ny maritrano. Mazava loatra ihany koa fa manana fitovitovizana endrin-tranon'ny vondron'orinasa tiko ihany koa ilay endri-trano.
 
 
 
Mety hisy ny hitsikera avy hatrany hoe filohan'ny Malagasy iray manontolo izy koa nahoana no ny sekoly FJKM ihany no tadiaviny hokarakaraina fatratra. Filohan'ny Malagasy manontolo tokoa izy saingy tsy azo adinoina ny maha-ao amin'ny FJKM azy izay tsy zakan'ny sasany loatra. Mba manana ny adidiny isankarazany ihany koa izy ary tsy ny volam-panjakana no voatery ho nananganana ireny sekoly ireny. Manana ny fandresendahatra ao aminy izy raha nanapa-kevitra fa ny fampitomboana ny ambaindain'ny sekolim-piangonana no nataony fa tsy ny an'ny sekolim-panjakana ohatra.

Tonga ny fotoana, niongana ny filoha Ravalomanana, nozimbazimbaina ny filohan'ny FJKM, dia norobaina ihany koa ny fananan'ny FJKM indrindra fa ireo fitaovana saiky hananganana ny Lycée FJKM izay notantaraiko teo ambony ihany. Nalaza tamin'ny fiandohan'ity taona ity ny fampanantenana nataon'ny fitondrana hanomezana trano ho an'ny mpianatra tany Barikadimy, Toamasina sy teto Ankatso, Antananarivo. Voasakan'ny mpino tany Toamasina ny saiky handrobana ireo vy fanorenana ny trano (izany hoe ilay andry vy miloko manga efa notantaraiko tetsy ambony), enga anie mba ho izay hatrany fa tsy hoe lasan'ny MPANDROBA ireo fitaovana ireo amin'izao fotoana izao. Lasan'ny MPANGALATRA kosa ireo fitaovana rehetra saiky hananganana ny Lycée FJKM teto Antananarivo, izay nipirina tamina toerana iray teny Alarobia.
 
 
 
Fotoana fohy taorian'izany fandrobana izany dia nirehaka ny sasany fa hanangana trano ipetrahan'ny mpianatra eny Ankatso. Herinandro vitsivitsy taorian'ny fametrahana ny vatofehizoro dia indro fa niorina ireo trano anankiroa. Dia nipoitra ny entana halatra mba ho an'ny mpianatra... henjana ny zavamisy an! natao ho an'ny mpianatra ihany no niafaran'ireo entana halatra nokasaina ho an'ny mpianatra. Raha tsy mety hiorina ny trano ao Barikadimy satria ny tany Analakinina no nokasaina voalohany halaina hanaovana ny fanorenana, fa enga anie ho diso izay fiheverako izay fa enga anie sady tsy voaroba ny entana tao Analakininina Toamasina nefa an-dalam-panorenana ihany koa ny trano ho an'ny mpianatra ao Barikadimy.
 
 
 
Raha ny ao Ankatso manko dia be loatra ka lasa porofo fa ny fitaovana nalaina tao Alarobia ireo nananganana ny trano eo Ankatso ireo. Andry vy miloko manga antitra, 6 no isan'ny andry amin'ny sakan'ny trano ary 17 tahaka ilay tranon'ny sekoly FJKM tany Mahajanga ny isan'ny andry manaraka ny lavany, telo ny rihana ary somary boribory fa tsy tena marindrano. Fehiny, ny sary fotsiny jerena dia hamarino ka ho tahaka ny ahoana ny fifanarahana teo amin'ny mpangalatra sy ny nangalarana ankoatra ny famerenana ny entana halatra amin'ny tompony?

 
 
 
Jentilisa teto Antananarivo 07 jolay 2010 na 07-07-10 amin'ny 01:00

Hevitra

Mendrika

Toa feno fahendrena ny zavatra soratanao eto. Isaorana anao feno.

Nampidirin'i poiuyt @ 07:48, 2010-07-07 [Valio]

De ahaoana ozizy le bandy miara miasa aminao tena FJKM iringiriny nefa minia mikipy @ zao zvt asehonao izao

Nampidirin'i Lire @ 09:56, 2010-07-07 [Valio]

Mpangalatra

Natomboka t@ halatra fahefana, tohizana @ halatra samihafa: fitaovan'ny FJKM, andramena, ...
Tanana zatra mitsotra tsy hijanona raha tsy tonga any @ halabato.

Nampidirin'i bozyboleta @ 14:23, 2010-07-07 [Valio]

mpino fjkm

Tsara ho fantatry ny tsy FJKM ny tantara sy ny fomba fiasantsika fjkm.T@ fahampanjaka dia protestanta daholo ny mpanjaka sy ny taranany rehetra nifandimby teto madagascar ary tsy azo lavina izany ary porofon izany ny fiangonana ao anaty rova sy ireo taranak andriana rehetra zay fjkm avokoa ny ankabeazany. Manana ny maha izy azy avokoa ny mpino rehetra ao.Ny fjkm tsy mba manana vazaha menasofina mpanome fanampiana takalompatsa vidimpihinanana fa ny mpino tsirairay ao no mifanome tanana hapandeha zany fiangonana izany. Foin'ny mpino tsirairay avy tokoa ny fananany entina hanamboarana ny tranon Andriamanitra sy zay rehetra momba azy ohatra iray azo tsapay tanana ny ataon Atoa RAVALOMANANA Marc. Ary tsy izy irery ihany fa tena maro tokoa ireo mahafoy volamankarena toa azy. Tsy mbola filoha akory izy dia efa tia manampy fiangoanana ary notohizany hatrany zany na dia efa filoha ary izy ary mino aho fa mbola ho tohizany hatrany izany.Ny mpino fjkm dia fière @ maha fjkm azy tokoa ka tsy ho voahozongozona satria io no tena finona gasy pur tsy misy fangarony.Na eo aza ny fanenjehana atao azy dia mino aho fa vao maika hiroborobo izany fiangonana fjkm izany zay gasy pur sang avokoa ny mpitondra ao aminy ary rariny sy hintsiny raha miredareda ny fitiavantanindrazana ao anatiny. Homba antsika Andriamanitra
Nampidirin'i elisa @ 15:48, 2010-07-07 [Valio]

ah

resaka hafa aloha zareo a : misy fampirantiana momba ny tantaran'i Mkara ao @ CCAC zao. Ma tsidiho fa tena maaliana, sady koa misy horonan-tsary mbola tsy niseho fahitalavitra mihitsy : momba ny fanjanahan-tany sy ny taty aoriana.

Misaotra e

Nampidirin'i 29 martsa @ 09:36, 2010-07-10 [Valio]

ok

Ho an'i Elisa :

Ekeko ny tantaran'ny FJKM izay nampatsiahivinao.

Fa ny filazànao resaka gasy "pur sang" kosa dia diso tafahoatra. Ny resaka toy io no mitarika fanavakavahana.

FJKM izaho izay manoratra, nefa izaho manokana dia mandray ny hafa finoana amiko ho gasy tahaka ahy avokoa.

Nampidirin'i 29 martsa @ 16:38, 2010-07-16 [Valio]

ok!

Raha izaho mamaky dia tsy nanavaka ny hafa akory ilay hoe finoana gasy pur,ka aleo tsy dia handray an-tendrony fa marina ny voalaza !!!fier amin'ny maha FJKM izaho ianao indirndra isika rehetra manana ny filoha Ravalomanana.

Nampidirin'i rabary @ 14:14, 2010-07-18 [Valio]

tsaroko de tsaroko ko ny zvtr nataon'i Mr Marc RAVALOMANANA tao @ fiangonako, FLM izaho ary tena nahita fa tia manampy ny fiangonana rehetra izy! Nanome vola ho an'ny Sekoly alahady izy mba ho fanohanana ny formation natao t@zany ary ko nanome vola ho any Tafika Masina, tao @ FLM no nanaovany izany! tena ontsa be ny foko mahita ny zv-mitranga @zao fotoana izao sy ny zvtra nolazainao tetsy ambony momba ilay fianarana!!! de toy izany ve no fomba fisainan'izao fitondrana @ zao e!!! Mino aho fa Andriamanitra mijery izany rehetra izany ary manana ny lamina hamaliany ny ratsy fanahy

Nampidirin'i inconnu @ 15:58, 2011-04-29 [Valio]

Vitan'olona avokoa no resahintsika eto; fa moa mba afaka milaza izay vitantsika sy ho-ataontsika tsirairay avy koa ary ve isika ireo?Raha izany manko no tanteraka dia handroso i Gasikara ito!Miainga amiko aloha ny fanovana sy ny hetsika izay vao miresaka ny hafa!

Nampidirin'i Gasikamanja @ 08:45, 2012-06-06 [Valio]

Samy manana ny anjara birikiny ny tsirairay, anjaran'izay mihazona ny fahefana kosa no mandrisika na manakana izany anjara birikin'ny tsirairay izany. Izay no antony ifidianana izay hisolo tena mba ho izay mifanakaiky tanjona aminy no fidiany hanamorana ny fananganan-javatra ataony na ny fanamorana izany.

Nampidirin'i jentilisa @ 08:56, 2012-06-06 [Valio]

Hampiditra hevitra

Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Septambra 2017 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox