« | »

Iza no tena dahalo?

2014-11-16 @ 11:01 in Ankapobeny

Hatry ny ela dia ny dahalo no malaza amin'ny resaka fampijaliana olona sy ny fampirohorohoana. Fa misy ihany koa ireo olona any amin'ireny toerana anjakan'ny dahalo ireny no milaza fa misy koa ireo lazaina ho mpitandro ny filaminana no mihoatra amin'ny fahefana ataony ka mamaky trano sy mandroba ny fananana kelin'ny olona ary mamono na midaroka ihany koa. Nanokatra fahalalàna bebe kokoa momba ny toe-draharaha teto Madagasikara ny fandaharana iray tao amin'ny fahitalavitra tamin'ny faran'ity herinandro ity. (rohy youtube)




Tao amin'ny fanavazavan'Atoa Latimer Rangers, mpanao gazety fanta-daza tamin'ny fandaharana iray tamin'ny onjampeom-pirenena nandritra ny repoblika faharoa antsoina hoe "Tanàna, lalana sy havoana mena masoandro" izay matetika tratran'ny sivana mahery vaika ka nandefasana io fandaharana io ho amin'ny alimbe heverina fa tsy misy mihaino intsony no nahafantarako ny lanjan'ity lahatsary iray eto ambany ahitana ny fampijalian'ny miaramila ireo olona mirahalahy noho ny fitondrana ody sy ny tsy fitondrana pasipaoro ity: (rohy youtube)



Hampisy ny fahazoan-dresaka tamin'ny fanamafisana nosoratan'Atoa Latimer Rangers hoan'ny gazety nasionaly iray eto an-tanindrazana fa tonga dia azo tondroina ho dahalo, na malaso, avokoa ny lehilahy rehetra mitondra moara, ody, rojo, fehin-tanana. Dia indro porofoin'ny sary ihany fa dia mahazo daroka mandritra ny famotorana azy ireo ny olona nitondra moara na ody any amin'ny toerana tsy misy andriamanitra (lavitr'andriana hoy ny fiteny efa tokony ho ntaolo saingy mbola azon'ny besinimaro mandraka ankehitriny). Fanendrikendrehana miteraka fanosihosena ny zon'olombelona sy ny hasiny. Anisan'ny mampihoron-koditra indrindra ihany koa ny fandrenesana fa isak'izay hivoaka ny tananany ny olona any amin'ireny faritra ireny dia tsy maintsy maka pasipaoro any amin'ny lehiben'ny fokontany, na dia hamonjy tsena fotsiny aza, voahosihosy tanteraka ao anatin'izany toe-javatra izany ny zo hivezivezy malalaka eto amin'ity tanindrazantsika ity. Misy ve noho izany ny sokajin'olona voafetra tanteraka ny fahazoany mivezivezy?

Ny lahatsary farany atolotra antsika dia fijoroana ataon'ireo olona niharan'ny antsojay nataon'ny miaramila nolazaina fa nanatontosa "opération" na izay soratanay amin'ny teny malagasy hoe "bemidina" hanakanana ny asan-dahalo nefa toa lasa mibolisatra tamin'ny iraka nampanaovina azy ireo. (rohy youtube)

 

 


Taorian'ireo natolotra anareo ireo dia tsara ny mijery amin'ny zoro hafa ny momba ireo lazaina fa "dahalo niova fo, kotro tonga saina, dahalo milavo lefona" ireo.

.

.

.

Jentilisa 16 novambra 2014

 

Hevitra

Ny anto-pisian'ny zandary, polisy ary ny folo alin-dahy iray manotolo mihintsy no mila dinihana sy hoe ilana reforme eto amintsika...
raha ny hoe "hoan'ny tanindrazana" no tarigetra kanefa lasa fitaovana hanapepoana, hampihorohoroana, hamoretana ny vahoaka hatrany ny ampiasana azy dia otran'ny hoe rano eo andamosin'ny ganagana: mandalo miserana ary tsisy dikany...
Jereo anie e, in no tena mba zavatra tsara hoe nisongadina ka tena hita hoe azo hitehafana sy hiarabana an'izy ireo? zero manatody... ny tena dahalo sy hoe fitandrovana ny fandria-pahalemana tsy mande @ ze lahoriny fa dia misavoritaka otran'ny kitay... kanefa ny olona izy hoe mitokona sy maneho ny heviny ampilaminana ihany no tena maha-maika azy ny handrava sy hoe hanapotika azy... dia izao indray, ny zo maha-olona iray manotolo no atao tsinotsinona any Atsimo satria hoe "mitandro ny filaminana", dia hankaiza anefa izao io?? fandriam-pahalemana artificialy... na hoe ela na ho aingana tsy maintsy hitroatra ny olona ra ho raisina toy ny biby...
dia asa ra mba misy fisainana ihany ny mpitondra ankehitriny hoe tombotsoany ve ny hampijaly vahoaka otran'zao? ra hoe fampijaliana vokatry ny natiora toy hoe tsisy rano dia efa tokony hisaina hoe andray andraikitra... na ny resaka hoe jirama fotsiny koa ary na hoe kere sy ny karazany dia efa hita hoe tsisy politika hivoana @ zany ny fanjakana... fa dia ny hoe hitondra fampijaliana sy famoretana iniana atao tsotra izao... eee dia asa aloha ee... ra izao no mitohy dia ho omena nomerao tsirairay ny olona ary araka izany ny toerana azony aleha, ny asa azony atao, ny fianarana azony tohizana... moa ka tsy izany va no atao apartheid???

Nampidirin'i simp @ 06:12, 2014-11-18 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Jiona 2018 »
Ah At Ta Ar Ak Zo As
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
Tahiry
Credits
LifeType IE7 XHTML CSS Firefox