«

Naninona Rajao no resy be?

2018-11-09 @ 20:43 in Politika

Zavatra vitsivitsy no azo marihina amin'izao aorian'ny fifidianana ho filoham-pirenena teto Madagasikara taona 2018 izao. Ny zavatra lazaina eto ka nanaitra ny besinimaro dia ny isambato sy ny isanjato kely azon'ny filoham-pirenena farany teto amin'ny firenena, Atoa Rajaonarimampianina Rakotoarimanana Hery Martial, tsy nampoizina tokoa ny vokatra izay tena kely dia kely tokoa raha jerena tamin'ny naha-filoham-pirenena azy ka mahalasa ny eritreritra hoe inona no mahatonga izany vokatra ratsy dia ratsy izany?---

 

 

Tena ratsy dia ratsy mihitsy angaha ny fitantanana nataony no sazian'ny safidim-bahoaka izy? Sa tsy nanao na inona na inona mihitsy izy nandritra ny fotoana nitondrany? Mba mieritreritra ihany ny tena hoe tsy mendrika ny zavatra nataony sy vitany kosa ilay isam-bato azony. Nisy ihany ny tanàna na renivohi-paritany teo aloha nananganana foto-drafitrasa, ary mba nanantena ihany izy hoe hahay hankasitraka ny zava-bitany ny tao amin'ny tanànan'i Fianarantsoa sy ny manodidina, satria heveriko fa tao no anisan'ny nomena tombondahiny manokana amin'ireny foto-drafitrasa ireny. ---

Azo singanina ihany koa fa nandritra ny fotoana nitondrany no nananganana ny fanitarana ny seranam-piaramanidina iraisampirenena eo Ivato sy ny fanitarana ny trano goavana mifandraika amin'izany. Fotodrafitrasa tsy maintsy natao izany satria io no vavahadin'i Madagasikara misokatra amin'ny any ivelany, nefa efa kely loatra sy toa zary efa nilaozan'ny toetr'andro ny fotodrafitrasa misy amin'izao fotoana izao. ---

Etsy ankilany, tsy lavina fa misy ny foto-drafitrasa noheverina ho reharehan'i Madagasikara tamin'ny nandraisana ny fihaonana an-tampon'ny Fikambanana miteny manontolo na ampahany ny teny frantsay. Nisy ny fotodrafitrasa natsangana, toy ny Village Voara (dobla V), saingy tsy vita hatramin'ny farany ny fananganana io toerana io ka zary henatra ho an'ny firenena, ny trano fandraisam-bahiny mihaja "an'olon-tsotra" ao Ivato indray no vita tsara sy natao handraisana ireo delegasiona avy any amin'ny firenena maro. Mifanila amin'izany ihany koa ilay lalana mampitohy an'Ivato Seranana amin'Isoavimasoandro izay nanify loatra ny tara natao taminy sady tonga dia lavadavaka be raha vao nandalovan'ny orana indray mandeha monja. Asa kitoatoa ka niteraka fahatezerana ho an'ireo nahita izany. ---

Tsy adinoina ihany ny ny tantara nanafintohina tamin'ny 'carte grise' sy 'permis' lazaina fa "biometrique" izay naloa tamin'ny vidiny lafo dia lafo. Efa nitaraina ireo nahatsikaritra fa tsy misy izay maha-"biometrique" ireo zava-droa loha ireo saingy norahonana ny hogadraina fa manakorontana ny fiainam-bahoaka. Kanjo Malagasy iray monina tany Etazonia, nilaza fa tsy izy ary tsy "biometrique" mihitsy ireo taratasy roa ireo, dia mody nolazaina fa misy rindrambaiko manokana mamaky ny zava-boasoratra ao anatiny. Ny zatra zavatra "biometrique" mahafantatra avy hatrany fa misy zavatra tsy milamina matoa tsy namoaka na inona na inona rehefa tarafina ilay kaody QR maha-biometrika ny biometrika. Efa hifarana ny fehim-potoana fiasana vao niaiky fa hay tsy nilamina tokoa ireo taratasy nosandaina volabe ny nanaovana azy, sady nandaniam-potoana lava dia lava. Alahelon'ny olona tany anaty ireny ka tany amin'ny fandrotsaham-bato ny olona no nanasazy ireo mpitondra voasaringotra tamin'ireo raharaha ireo ka niezaka ny hirotsaka hofidiana. ---

Lesona ho an'ny mpitondra manaraka io toe-javatra io fa ny tsy tokony hohadinoina dia kandidà nanoloana olona hafa tsy navela hirotsaka io rangahy iray nitantana an'i Madagasikara tao anatin'ny dimy taona latsaka io. Nanjary anaram-bositra azony nandritra ny fotoana nitondrany ny hoe "Rajaonarimampiesona". Saingy tamin'ity fifidianana ity ihany koa no nahitana hoe raha nampiesona izy dia nisy kandidà iray mbola "original" kokoa tamin'ny fampiesonana... ary ny tanora sy ny midoka tena ho mbola tanora no tena roboka sy sodòkan'ny fampiesonana ataony, saingy avelao ho tantara manaraka indray ny amin'izay...

Hevitra

Tsy latsa-batom-paharesen-dahatra loatra no misy eto fa latsa-batom-pankahalana. Tsy vote d'amour fa vote de haine. Mino aho fa raha ianao io, tsy ho nifidy 25 raha toa tsy isan'ny kandidà teo ny 12 sy 13. Ireo mpifidy HVM nandritra izay 5 taona izay mantsy dia ireo mpifidy 13 ihany no niofo.

Rehefa nanomboka ny pre-Campagne dia miseho taratra fa ny 13 sy 25 no hitarika. Eo amin'izay ireo mpankahala "mpanongam-panjakana" no mirona any amin'ny 25 daholo mba hibahanana ny 13 sy 12, ary ireo mpanohana ny "révolution orange 2009" no misafidy ny 13 mba hibahanana ny 25. Tsy misy anjara toerana ho an'ny kandidà hafa intsony eo, tsy misy ho an-dRajao. Izay ilay efa nambarako hoe ny Campagne tsy fandresen-dahatra ny mpifidy ny amin'ny programa loatra fa fanehoana hoe izaho no manana herijika afaka hibahana ilay ankolafy tsy mety aminao.

Aoka tsy hisy hirehareha na ny 13 na ny 25 hoe naharesy lahatra olona ka nahazo vato betsaka fa ny 40% an'ireny isam-bato azony ireny tsy "vote pour" anazy fa "votre contre" ilay mpifanandrina aminy.

Izay aloha ny manazava ny hoe na teo amin'ny faritra nahavitan'ny HVM fotodrafitrasa aza tsy nahazoany vato firy.

Na izany na tsy izany, marobe ihany koa ny niandry iny fifidianana iny hanaovana vote sanction, araka ny teninao. Marina loatra ireo lesoka voatanisanao : fanambakana ny Malagasy tamin'ny permis plastika, asa kitoatoa, halatra tsy voafina (nolazaina fa erreur de saisie),... Anisan'izay lehibe ihany koa ny kolikoly tsy miafina niresahana mallette ka nahagaga ny maro hoe maro an'isa ny mpanohana ny hevitry ny fitondrana any amin'ny antenimieram-pirenena. Ilay #MialaRajao efa nandrandrain'ny vahoaka hatramin'ny volana aprily noho ny fahasahian'ny HVM manao an-tery mampandany lalàna tsy rariny fa ny amin'ny fanontaniana hoe iza no handimby azy no niandry an'ity fifidianana ity ka nandeferan'ny vahoaka ilay didin'ny HCC.

Momba ilay teninao hoe misy tanora mampiesona. Izaho manokana mbola resy lahatra fa hisy ny 2e tour ary mety hifidy 13 aho raha sanatria ny 25 manaiky hifampiraharaha amin'ny 12 eo. Na iza na iza hotohanan'ny 12 dia ny mpifanandrina aminy no hofidiako. Mety izaho irery no hanohy ny vote sanction sy vote de haine any amin'ny 2e tour, fa tiako hapetraka foana hoe tsy izay mahazo 51% akory no mamim-bahoaka fa amin'izay 51% izay mety ny antsasany ihany no resy lahatra tanteraka.

Farany, mety mba hilamina ny firenena raha toa manaiky hiara-miasa ny 13 sy 25. Aoka ny mpanohana ny andaniny sy ankilany tsy hifankahala sy hifanenjika fa ratsy no ho vokatr'izany. Rehefa misy ny mpifanandrina iombonana (ny 12) dia mahay miray hina ihany ny ankolafy roa, fa rehefa resy iny dia mifandrirotra indray. Mety ho sarotra be izany 13 sy 25 lasa 38 izany noho ny mpamatsy vola tsy maintsy hamerenam-bola ho an'ny iray nefa raha mba izay no mitranga mba tsy ho lany andro mifanaratsy isika fa mifaninana amin'ny tsara kosa.

Nampidirin'i DotMG @ 05:41, 2018-11-10 [Valio]
Hampiditra hevitra

E-mail me when comments occur on this article
Momba ahy
jentilisa

Vasoky ny tambajotra sosialy tahaka ny Facebook,Twitter sy ny karazany ny blaogy amin'izao fotoana. Mora miely vetivety ny hevitra sy izay voasoratra amin'ireo sehatra ireo.

Misy lafiny iray anefa tsy ahavoazan'izy ireo mihitsy ny blaogy dia ny fitehirizana.Rehefa karohina ny vontoaty iray dia sarotra hita kokoa ny vokatry ny fitadiavana avy amin'ireo tambajotra sosialy ireo.Izay lafiny izay no tsy maharesy tondromaso ny blaogy satria mora hita kokoa ny vontoatiny rehefa karohina amin'ny alalan'ny mili-pitadiavana.

Momba ny eto manokana indray, tsy hianona intsony amin'ny vaovao eto an-toerana aho fa hisokatra kokoa amin'ny manerantany, na amin'ny sehatra ankapobeny. Hosoratana avokoa na eritreritra sendra nandalo na revin-gadra, na fanehoan-kevitra mety hanafintohina ny mpamaky. Mety ho tezitra ianao amin'izay voasoratra nefa ny hisokafan'ny saina handinika sy hamakafaka ary handanjalanja no tena kinasa ambadiky ny lahatsoratra. Ka mazotoa daholo ary ny hevitra anie no hiady fa tsy isika no hifandramatra!

calendar
« Novambra 2018 »
Ah At Ta Ar Ak Zo As
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30  
Tahiry
Credits
LifeType IE7 XHTML CSS Firefox